Vote chhiar ni sawn tura ngenna thlen leh a ni

Mizoram Kohhran Hruaitu Committee (MKHC) kaihhruaiin Mizoram-a tlawmngai pawl leh Political Party hrang hrang hruaitu ten Mizoram Assembly inthlanpui vote tla te chhiar hun sawn tura an ngenna a la hlawhtlin theih loh avangin nimin khan Mizoram Chief Electoral Officer (CEO) Madhup Vyas chu a Pisa-ah an hmu.

Nimin-a Mizoram CEO an hmuhna hunah hian MKHC, NGO Coordination Committee hruaitute leh Political Party hrang hrang bakah MPF hruaitute pawh telin, vote chhiar hun atan Election Commission of India-in hun a ruat December ni 3, 2023 chu Kristian te ni serh, Pathianni a nih avangin a hun sawn tura an ngenna kawngah CEO chu thawhpui turin an sawm a, Vote tla te chhiar ni tura lo ruahman tawh chu a tuk Thawhtanni emaw, Thawhlehni-ah emaw sawn turin an ngen a. An ngenna te hi tawngka bakah ziaka thlenin CEO chuan thuneitu sang-ah a lo thlen tur thu a sawi a. ECI-ah hian Vote chhiar ni sawn tura ngenna thehlut nawn turin a lo ngen bawk a ni.

Mizoram Kohhran Hruaitu Committee (MKHC) Joint Secretary Lalnilawma Colney chuan tuna an hmalakna chu MKHC anga an hmalak theihna sang ber a nih thu sawiin, tun tum hi Vote chhiar ni sawn tura ngenna tum thum an thehluhna a nih thu a sawi a. CEO-in chhanna a pek chu a lawmawm lam a nih thu leh a ngaihthat thlak thu a sawi a, an ngenna hmasaah ECI atanga chhanna darkar 24 chhungin beisei mahse tun tuma an ngennah chuan hun bituk an nei lo tih a sawi bawk a. Hmalak zel dan tur chu Party leh NGO te kutah a innghat tawh niin a sawi bawk.

Nimin-a Mizoram CEO an kawm zawh hnu hian Political Party dang- MNF, Congress, BJP, ZPM leh AAP te bakah Mizoram People Forum (MPF) te pawhin vote chhiar hun sawn tura ngen hi an thehlut nghal nia thudawn a ni bawk a. Political Party hrang hrangte hian hemi hmalam hian ngenna hi an lo thlen tawh bawk a ni.