Vawiin ah Muallungthu-ah Vote thlak leh dawn

Mizoram Legislative Assembly Inthlanpui neih mekah tukin dar 7:00 atang hian 20-Aizawl South -III (ST) Assembly Constituency huamchhunga awm 13-Muallungthu Polling Station-ah Vote thlak that leh a ni dawn.

Mizoram Legislative Assembly, 2023-ah hian Thawhlehni khan Polling Station hrang hrangah Vote hi thlak a lo ni tawh a, Nilaini-a Polling Official-te Document pawimawh hrang hrangte endikna, Post Poll Scrutiny neih ah 13-Muallungthu Polling Station-ah hian vote thlak hmaa neih hmasak phawt thin, EVM hmanga vote thlak chhinna ‘Mock Poll’ neihna a vote tlate dan anga paih (clear) fel hmasa phawt lova mipui vote thlak kalpui tlang a ni tih hriat a ni a. Hemi chungchangah hian inrawnkhawmna neih a nih hnuah bialtu Returning Officer (RO) chuan Observer nen inrawnin inthlan that neih rawtna ECI ah a thlen a. ECI chuan sub-Section (2) of Section 58 of the Representation of the People Act, 1951 tlawhchhanin Thawhlehni-a 13-Muallungthu PS-a vote thlak chu a rawn cancel a. ECI inkaihhruaina duan Chapter 13 of Hand Book for Returning Officer, 2023 sawi angin RO atanga rawtna lut chu ngun taka a ngaihtuah hnuah vote thlak that (Repoll) neih a rawn rem ti a; a hun atan November ni 10, 2023 (Zirtawpni) zing dar 7:00 atanga tlai dar 4:00 a rawn ruat a ni. He Polling Station-ah hian Voters 1083 a awm a ni.