Manipur-a buaina thleng chinfel a nih theih nan Aizawl-ah Zirlai ten punkhawm an nei

North East Students’ Organisation (NESO) Executive Council Meeting in a lo rel tawh angin nimin khan Aizawl Vanapa Hall kawt-ah ‘Demonstration for Peace and Permanent Solution in Manipur’ tih thupui hmangin Sit-in demonstration neih a ni a, Manipur-a buaina thleng chinfel thuai nise an duh thu an sawi a ni.

North East Students’ Organisation (NESO) ruahman anga Sit-in demonstration hi Aizawl-ah hian MZP huaihawtin neih a ni a, he hunah hian MZP General Hqrs. President H. Lalthianghlima chuan MZP leh NESO in Manipur buaina chinfel a nih theih nan hma an lak zel dawn thu leh Manipur-a remna leh muanna tluantling a awm theih nan tih hreh an nei dawn loh thu a sawi a. Zofate chenna hmun tin-a buai emaw tih mai turin Manipur, Burma leh Bangladesh bakah tunhma deuhin Assam-ah pawh Zofate chenna a buai thu a sawi a. Heng buaina-ah te hian Mizo nihna angin theihtawp an chhuah tlan thu leh an lo tuamhlawm thu a sawi a, heng avang hian MZP chuan Zofa unau zawng zawngte chungah lawmthu an sawi tih a sawi. MZP President chuan Manipur-ah hian he buaina avang hian zirna chhunzawm hleih theih a nih loh thu sawiin, Zofa unaute an buai laiin vawi khat pawh buaina an tawhna hmun rap ngam lo Chief Minister an duh tawh loh thu a sawi a. Prime Minister pawhin Vawiin thlengin Manipur a la rap ngam lo tih sawiin, Manipur a kal lo a nih chuan Mizoram leilung a rawn rah leh hunah pawndum nen zirlaite’n an lo hmuah tawh tur thu a sawi a. Manipur-a remna tluantling a awm theih nan MZP chuan hma an lak dawn thu leh tihtur awm apiang an tih dawn thu a sawi a. Zirlai pungkhawm te pawh an hmalak zelna tura ngaihtuahna fim hmanga MZP te tawiawm zel turin a sawm bawk.

MZP General Hqrs. Vice President C. Lalremruata kaihhruai he hunah hian NESO Vice Chairman Ricky Lalbiakmawia chuan Manipur buaina hian a daih rei ta hle tih sawiin, “Central Sawrkar-in chinfel tum lova a thlirliam mai mai hi NESO-in kan dem takzet a. Tan bik neia an hmalakna titawp turin leh buaina tireh thuai tura kan duh avangin Vawiin-ah hian kan pungkhawm a ni,” a ti bawk.

India hmarchhak-a Zirlai pawl 8 te telna, North East Students Organisation (NESO) hian Manipur buaina chinfel thuai phutin hmarchhak State khawpui tinah nimin khan he hun hi an hmang a, he hunah hian an thilphut tarlanna thuziak hrang hrangte pawh an tarchhuak bawk a ni.