Tunkar-ah zangnadawmna pek fel vek hman tum a ni

National Highway-54 laihzauh leh siamthat hna thawh meka zangnadawmna pek tur ang ang te chu tunkar chhung hian pek kim vek tumin hma lak mek a ni.
Serchhip District chhunga NH-54 laihzauh leh siamthat hna thawh mekin Serchhip khawpui chhung a helna tura ram neitu ten zangnadawmna an dawn tur angte pek an phut avanga hnathawktute an lo dan tawh thin hnuah Serchhip by-pass a ram neitute hnena zangnadawmna pek tur cheng vbc. 1.62 chu tun thla ni 3 khan sanction fel a ni tawh nia thudawn a ni a, Serchhip DC Office-a thawktute chuan sanction an hmuh hnu hian Inthlanpui avangin hma lak nghal mai theih a ni lo tih sawiin, Inthlanpui te zawhfel a nih hnuah hmalak mek a nih thu leh tunkar chhung hian sum hi pekchhuah hman tum a nih thu an sawi a. NH. 54 in Serchhip a helna turah hian mi 19 leh Chhiahtlang a helna turah mi pakhat, an vaiin mi 20 te hnenah zangnadawmna hi pek leh tura ruahman a nih thu an sawi a ni.

Serchhip DC Office-a thawktute chuan by-pass road bakah NH. 54 laihzauh meka ram lak sak leh zangnadawmna la dawnglo te pawh tunkar chhung hian tihfel theih beisei a nih thu an sawi bawk a. Heng mite tana zangnadawmna pek tur cheng vbc. 4.4 chu sanction hmuh a nih tawh bawk thu sawiin, a theih ang ang hmalak zui a nih tur thu leh harsatna dang a awm a nih loh chuan tunkar chhunga peihfel hman beisei a nih thu an sawi bawk a. Zangnadawmna an dawn tur ang la dawng lo hi Serchhip District chhungah by-pass road tel lovin mi 70 an la awm thu an sawi bawk a ni.

Hetihlai hian ram lak tura zangnadawmna pek tawh, mahni In la senghawi lo te chungchang ah pawh DC Office-a thawktute chuan Inthlanpui puan a nih tak avanga ruahmanna hmasa anga hma an lak theih rih loh thu leh tunah chuan Inthlanpui te zawhfel a nih tak avangin hmalak thuai an in beisei thu an sawi a ni.