Scholarship pekchhuah har vangin Zirlaite Aizawl-ah pungkhawmin CEC-ah ngenna an thlen

Zirlaite Scholarship 2nd Installment pekchhuah har a nih avanga lungawi lohna lantir nan leh Scholarship sum pekchhuah vat phutin nimin khan Aizawl-a Mizoram Scholarship Board (MSB) Office tual-ah zirlaite an pungkhawm a, an hmalakna in awmzia a neih loh avangin Vawiin hian punkhawm hi neih leh tum a ni.

Sawrkar laipui in September 25-a Tribal Scholarship Sanction Order a tihchhuah tawh hnuah nimin thlenga sem a la nih loh avanga lungawi loh lantir nana MZP General Hqrs. bultuma zirlaite punkhawmna ah hian MZP President H. Lalthianghlima chuan Scholarship buaipuitu ten hetianga ti lo thei lo hian an siam nia sawiin, tun tum hi a bultanna a nih thu leh awmzia a nei lo a nih chuan a tawp thlenga hmalak an tum thu a sawi a. Nimin-a an hmalakna hian awmzia a neih loh avangin Vawiin chawhma dar 10:00 atang hian MSB Office kawt-ah hian pun-khawm hi neih leh an tum a ni.

Hetihlai hian Mizoram Scholarship Board Secretary Dr. PL. Ramliana chuan Zirlaite tana Scholarship Second instalment pawisa chu Nov. ni 9, 2023 khan an dawn tawh thu leh MLA inthlan lai a nih avangin Model Code of Conduct in a phuar thu a sawi a, sum hi pek vat a nih theih nan exempt turin department-in an siam thute, Mizoram Chief Secretary hova Screening Committee-in an dilna chu a pawm thu leh Election Commission of India (ECI)-a dilna thehluh chu ngaihchan mek a nih thu a sawi a, approval an hmu a nih chuan zirlaite account-ah thun nghal tura an in buatsaih fel tawh thu a sawi bawk.

Hetianga Election Commission-ah phalna lak a ngai nia sawi a nih avang hian nimin vek khan MZP hruaitute chuan Mizoram Joint Chief Electoral Officer hmuin zirlaite Scholarship pekchhuah vat a tul thu an sawipui nghal a. Chief Election Commissioner of India hnenah pawh zirlaite scholarship pekchhuah phalna pe vat tura ngenna lehkha an thawn bawk a ni.

MZP hruaitute chuan Zirlaite Scholarship Second installment tang hi cheng nuai 1,787.48 zet a nih thu sawiin, Scholarship la dawng lo te hi Mizoram chhunga zirna In 36 atangin zirlai 5,023 bakah Pawl XI leh XII zirlai 11,462 bakah Mizoram pawna awm zirlai mi 3,010 te an ni tih an sawi a. Mizoram sawrkar kutah sum hi Sept. 25 khan a lut tawh niin an sawi bawk.