Thenzawl-a sumdawnna dawr lian te enfiah a ni

Serchhip-a Taxation Department chuan nimin khan Thenzawl khaw chhunga dawr lian hrang hrangah Mobile Checking an nei.
Election Commission of India (ECI) in State Goods and Services Tax (SGST) khawihtu State Taxation Department a phut angin, Commissioner of State Tax, Mizoram chuan Mizoram District hrang hranga Taxation Office-te Mobile squad te din tur leh a ranglama hma la tura a tih angin Thenzawl-a sum-dawnna dawr lian te hi enfiah a ni a. He hun hi Asst.Commissioner of State Tax Vanlalruata Ralte hova neih niin hemi hmalam hian Serchhip khawpui chhunga sumdawnna dawr lian te chu enfiah a lo ni tawh bawk a ni.

He Mobile Checking-in a tum ber chu MLA General Election lo awm tur denchhena Political party-ten sumdawngte kaltlanga dawr bungraw hrang hrangte Election Campaign nana lo hman awm palh thei venna tur a ni. Hetianga Physical Checking an neih bakah hian Taxation Department Officials-te chuan GST Portal (GST Network) atangin Serchhip District chhunga GST hnuaia dawr in register te chu Election dawn hnaiha tam uchuak taka bungraw chahlut thar hluai leh chhiah pe tam thar hluai an awm em tih te chu Online-a an chhiah pekna leh bungraw lakna atangin an en bawk a ni. Heta an thil hmuhchhuah hi Commissioner of State Tax, Mizoram Office-ah an report anga, Commissioner of State Tax Office atangin Election Commission of India (ECI) hnenah report pek leh a ni ang.