Serchhip District-a Candidate te sum hman dan a tum hnihna atan enfiah leh a ni

Assembly Inthlanpui neih tura Serchhip District chhung Assembly Bial pathum-a MLA Candidate te sum hman tawh dan enfiahna chu nimin khan a tum hnihna atan neih a ni a, he hun hi Serchhip District tana Expenditure Observer Umesh Phade IRS chuan a telpui a ni.
Candidate te sum hman dan enfiahna hi nimin khan Serchhip DC Office Complex-a Expenditure Monitoring Team Room-ah neih niin he hunah hian Candidate hrang hrangte Expenditure Agent te an tel a, nitin sum an hman dan tarlanna te enfiah niin sum hman dan ah fello leh Dan in a phal aia tam hmang an awm lo a, Bank Account vawn danah erawh thil dik tawk lo a awm avangin Vawiin hian Bank aiawhte hi kohkhawm leh tura ruahmanna siam a ni.


Nimin-a Candidate te sum hman tawh dan enfiahna atanga a lan danin Serchhip Bial a Candidate mi 6 ten sum an hman tawh chu Rs. 11,96,305/- niin mimal a sum hmang tam ber ZPM Candidate Lalduhoma chuan Rs. 5,84,390/- a hmang tawh a. INC Candidate R. Vanlaltluanga chuan Rs. 2,61,900/- hmang tawhin MNF Candidate J. Malsawmzuala Vanchhawng chuan Rs. 1,99,750/- a hmang tawh a, Independent Candidate Lalawmpuia Renthlei chuan Rs. 19,305/- hmang tawhin Independent Candidate bawk Ramhlun-Edena chuan Rs. 26,300/- a hmang tawh a, BJP Candidate K. Vanlalruati chuan Rs. 1,04,660/- a hmang tawh bawk.

Tuikum Bial a Candidate pali te sum hman tawh chu Rs. 6,81,240/- niin MNF Candidate Er. Lalrinawma chuan Rs. 2,40,365/- a hmang tawh a, INC Candidate TT. Zothansanga’n Rs. 1,79,800/- leh ZPM Candidate PC. Vanlalruata’n Rs. 1,35,770/- an hmang tawh a. Independent Candidate C. Lalrinmawii chuan Rs. 1,25,375 a hmang tawh bawk.

Hrangturzo Bial chu Candidate te sum hman tamna ber bial niin Candidate panga te sum hman tawh chu Rs. 18,73,055/- a ni a, INC Candidate Lalrorenga chuan Rs. 7,91,760/- hmang tawhin MNF Candidate Lalremruata Chhangte in Rs. 5,30,000/- leh ZPM Candidate Lalmuanpuia Punte in Rs. 4,63,590/- a hmang tawh a. BJP Candidate Lalmalsawma chuan Rs. 82,705/- hmang tawhin Independent Candidate Zaichhawna Hlawndo in Rs. 5000/- a hmang tawh bawk a ni.

Candidate hrang hrangte sum hman dan hi mumal taka vawn vek niin a enfiah duhte tan pawh Expenditure Monitoring Team Room-ah hian enfiah theih a ni a, Candidate te sum hman dan hi tum khat enfiah leh a la ni dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man