Postal Ballot-a thu post ‘Fake News’ a nih thu sawi

Tunhnaiah Whatsapp Group pahnih- ‘Thupui Sawi Hona’ leh ‘Mizoram Draught Association’ tih Group-ah mi tu emaw in Serchhip Assembly Constituency-a Postal Ballot hmanga vote tlak dan leh Candidate te vote hmuh tawh dan tih post in hei hi Serchhip District Election Officer David Lalthantluanga chuan thu dik lo, phuahchawp ‘fake news’ a ni tih mipuite a hriattir a. Fake news theh-darh chu Election Commission of India (ECI) chuan a khap tlat tih pawh DEO chuan sawiin, hetiang thil titu chungah hian Serchhip District Election Office chuan dan angin hma a la mek thu a sawi a. Hetiang thil hi a thlen tawh loh nan fimkhur turin mipuite chu DEO chuan a hriattir nghal bawk.

India ram, democracy ramah hian ECI chuan inthlanna fel fai leh dik a awm theih nan nasa takin hma a la tih pawh sawiin, “Vote chhiar a nih hmaa vote hmuh dan lo hriat lawk hi thil theih loh hulhual a ni,” tiin Tu te pawhin zalen taka an mi duh te an thlan theihna turin ‘Secrecy of Voting’ hi khauh takin Election Commission of India chuan a kalpui tih DEO chuan mipuite a hriattir nawn leh bawk a ni.

Home Voting leh Postal Ballot hmanga vote thlak te reng reng pawh Candidate aiawh ten vote thlak lai an enpui mai bakah Ballot Paper dahna Strong Room hawn leh tihfel pawh Candidate Agent te hmuh laia tih vek a ni tih sawiin, “Tu emaw ina vote tlak dan lo hriat hi thil theih loh hul hual a ni,” a ti a. “Ballot paper te hi Armed Security venna hnuaiah Strong Room-ah dah a ni a, vote chhiar ni (Counting Day) ah phawrh a ni chauh ang. Ballot Paper dahna hmun him leh him loh en duh tan DC Office Strong Room leh a velte a duh apiangin thlithlai theih reng a ni,” a ti bawk.