ZPM in Serchhip leh Thenzawl-ah Inthlanpui atana Campaign kharna hun an hmang

Zoram People Movement (ZPM) chuan Assembly Inthlanpui neih tur atana Campaign kharna hun nimin khan Serchhip leh Thenzawl-ah an hmang a, he hunah hian ZPM President Lalliansawta leh leh Serchhip Bial-a ZPM Candidate Lalduhoma bakah an Party hruaitu thenkhat ten thu an sawi a ni.

MPF kaihhruaina hnuaia Serchhip Bazar-a ZPM Campaign kharna hunah hian Serchhip Bial-a ZPM Candidate Lalduhoma chuan Sawrkar kan neih thin ang nei turin an fuankhawm lo tih sawiin, tunlai a tawngkam lar tak, party dang in an hman thin chu ‘Anni pawh lo sawrkar se la engmah an ni bik lovang’ tih a nih thu a sawi a. “Chumi awmzia chu an lo sawrkar tawh thin a, engmah an i lo tih an puang a, an pawm tihna a ni,” tiin hei hi beidawng aw a nih thu a sawi a, “Beidawnna hi Setana hmanrua a ni a, Beiseina hi Pathian hmanrua a ni. Chuvangin sawrkar kan neih thin ang nei turin Vawiin ah hian kan fuankhawm lo,” a ti a. “Sawrkar tha, Kalphung thar nei, Party sawrkar ninawm tak ni tawh lo, Mipui sawrkar dik tak din turin helai ah hian kan lo kal a ni,” a ti a. “Keini chuan sawrkar hmasa aia sawrkar tha zawk, sawrkar chak zawk siam ngei ngei hi mipuite kan tiam a ni,” a ti bawk.

ZPM Leader chuan an khingpui Party dang te chu Delhi-a Pu nei vek an nih thu sawiin, “Keini chuan Delhi-a Pu neih kan duh ve lo, keimahni’n hetah thutawp siam kan duh a ni,” a ti a. An lo sawrkar a nih pawhin National Level-ah eng pawl mah, eng Group mah zawm an tum lo tih sawiin, “Kan Zalenna kan humhim dawn. Thil tha an tih chuan kan support ang. Do ngai an nih chuan kan do ang,” tiin chutianga Regional party dik tak awmchhun an nih thu a sawi a. “A ram leh a felna kan zawng hmasa anga, Pathian in kawngpui tha, project tha min pe ang. Engkim a tha zawk min pe ang. Tul a tih hunah Independence pawh min pe ang,” a ti a. ZPM chuan an Policy zingah ‘Zohnahthlak zawng zawng rorelna pakhat hnuaia awm’ tih chu an dah reng thu leh an thlir reng thu a sawi bawk.

Serchhip-a ZPM in Campaign kharna hun nimin-a an hman ah hian ZPM Party General Hrqs. President, Upa Lalliansawta pawhin Party sawrkar nilovin mipui sawrkar dik tak hmuh an duh tawh tih a sawi a, ani bakah hian ZPM Southern Hqrs. President Lalrinpuii leh Mizoram Kut Hnathawktu Pawl President Upa C. Lalchawimawia te pawhin thu an sawi bawk.