National Games-a Medal la te lawmpui an ni

Tun thla ni 13-a Goa-a neih zawh tak National Games vawi 37-na a Mizoram tana Medal latute lawmpuina hun chu nimin khan Mizoram Olympic Association (MOA) chuan Ajal Club-ah an buatsaih a, Medal la te hi lawmpuina pawisafai hlan an ni.

Kumin a National Games neih zawh takah hian Mizoram atanga infiammi kal ten Gold Medal 2 leh Silver Medal 3 lain Mizoram in National Games-a result a neih that ber tum a ni a, Mizoram Contingent qualify atanga chhutin 35% in Medal an la a, State leh UT 36 tel zingah 27-na dinhmun a hauh phak bawk a. Taekwondo leh Weightlifing-ah Gold pakhat ve ve lain Taekwondo-ah Silver pahnih leh Boxing-ah Silver pakhat an la a. MOA hian Gold Medal la te hi Rs. 10,000/- an pek bakah Silver Medal la te Rs. 7000/- leh Bronze Medal la te hi Rs. 5000/- an pe a ni.

National Games-a Mizoram tana Medal la te lawmpuina hun MOA Senior Vice President F. Lalnienga kaihhruaina a neih hi Sports Minister Robert Romawia Royte chuan hmanpuiin India rama inelna sang ber National Games qualify tam zawk an awm theihna turin Mizoten kan theihna zawn infiamna hi kan kalnat a hun tawh tih sawiin, kumthar 2024 hian Uttarakhand-ah 38th National Games a awm leh dawn thu leh MOA chuan Medal tam zawk kan lak theihna turin Medal kan lak theihna hi nasa lehzualin an vulh tawh ang tih a sawi bawk a. He hunah hian Mizoram Contingent Chef de Mission V. Lalzawmliana chuan report a pe bawk a ni.

Comments

Popular News (Last 30 Days)

Vawiin-ah HSSLC Exam result