Myanmar Sipai Mizoram a rawn lut te thawnkir an ni

Myanmar ram-a mipui tangrual pawl ten Rihkhawdar leh Khawmawi-a Sipai Camp an lak hnua Mizoram-a rawn tlanchhia Myanmar sipai te chu nimin khan Hnahlan atangin Indian Air Force (IAF) Helicopter hmanga Myanmar lama hruai haw an ni.

Myanmar tualchhung buaina avanga mipui tangrual pawl ten Rikhawdar leh Khawmawi a Myanmar Sipai te hmunpui lak tuma an beihna ah hian Rihkhawdar-a Myanmar Sipai Camp an lak hnuah niminpiah tlai dar 5:00 vel khan Khaw-mawi-a Sipai Camp hi an la leh tih Mizoram IGP (Headquarters) Lalbiakthanga Khiangte chuan a sawi a. Nizan hmasa khan Myanmar Sipai 39 te chu Zokhawthar Police Station-ah lutin nimin zing khan midang pali an rawn luh belh leh a, Myanmar Sipai 43 te chuan ramri kanin Mizoram Police te hi an rawn bel a ni.

Thudawnna in a sawi danin Ministry of Home Affairs chuan Mizoram sawrkar hnenah Myanmar sipai Mizorama rawn lutte chu an kuta dah turin an rawn hriattir a, Zokhawthar Police Station atang hian Champhai-ah hruai an ni a, hemi ang hian Assam Rifles kuta hlan an nih hnuah nimin vek khan Hnahlan atangin IAF Helicopter hmangin Myanmar lama hruai haw an nih thu thudawnna chuan a sawi bawk.

Hetihlai hian he buaina thleng thar leh avang hian Khawmawi, Rihkhawdar leh a chhehvel khua atangin mi 5000 vel zet chuan himna zawngin Mizoram an rawn lut leh tawh a, Zokhawthar leh a chhehvel khaw hrang hrangah awmin khawtlang in a theih angin an buaipui mek a. Myanmar sipai te hian Khawmawi leh Rihkhawdar te hi an rawn bei leh dawn nia hriat a nih avangin a ep mai a awm Zokhawthar mipuite chu fimkhur tura chah an ni bawk.

Tun tum inkahna thleng avanga hliam tuar enkawl tura Aizawl lama thawn mi 8 te chu nimin khan Central YMA chuan Rs. 5000/- theuhin an kan bawk a ni.