Rilru lamah nasa takin mihringte hriselna a tlahniam mek - Governor

Mizoram Governor Dr. Hari Babu Kambhampati chuan tunlai khawvel hmasawnna sang zelah sum leh pai, ei leh bar bakah mahni bil hmasawnna tura kan intlansiak nasat avangin rilru lamah nasa takin mihringte hriselna a tlahniam mek tih a sawi.

Mizoram University-a School of Medical and Paremidical Sciences buatsaih ni thum awh Mithiam ten Rilru lama harsatna neite enkawl dan thar leh hmalam thlir lawkna, ‘Internatioal Conference’ nimin-a MZU Auditorium-a an buatsaih a hawnna ah he thu hi sawiin Governor chuan tunlai khawvel hmasawnna sang zelah sum leh pai, ei leh bar bakah mahni bil hmasawnna tura kan intlansiak nasat avangin rilru lamah nasa takin mihringte hriselna a tlahniam mek tih a sawi a. Tunah hian rilru lama harsatna tawk avangin mi tam tak an buai mek tih sawiin, “Mi tam takin nunna an chan mek bawk a. Chuvangin, rilru lama mithiamte hnathawh tur leh chonna tam tak kan khawtlang nunna hian a awm mek a. Psychology lam mithiam te leh zirlai ten mawhphurhna pawimawh tak nei mekin chonna lian tak an hmachhawn mek a ni,” a ti a. Rilru lama hriselna chungchanga zirhonna hun, khawvel pum huapa mithiam rual intawhkhawmna ni bawk Mizoram University in a thleng chu tha a tih thu leh ni thum chhunga hun an hman tur te pawh hlawk taka hmangho turin duhsakna a hlan a, hemi puala Souvenir buatsaih pawh a tlangzarh nghal a ni.

He hunah hian khual zahawm Gauhati High Court Judge Justice Nelson Sailo pawhin dan leh hrai kaihhnawih lam atangin rilru lama harsatna tawk te dinhmun a tarlang a. Khawvel pum huapa rilru lama harsatna avanga nunna cham tam tak an awm mek dan leh tanpuina engtia pek tur nge tih lam hawia thu sawiin, Psychology lam mithiamte mawhphurhna leh Society anga mawhphurhna pawimawh tak tak te a sawi a. He Conference a mithiamte kalkhawm zinga tel, Mizo zirlai rual te hnenah Mizoram-ah engtin nge an thiamna te a mamawhtu mipui tam tak tan an pek theih ang ti a ngaihtuahna seng turin chona a pe bawk a ni.

International Conference on ‘Emerging Trends in Psychological Interventions (Health and Allied Sciences): Future Prospects and Challenges’ hawnna hunah hian Dr. Laxmi Narayna Rathore, Covenener, ICSMPS, MZU chuan he International Conference chungchangah thu hmahruai a sawi a. Prof. Zokaitluangi, Conferenc Director, ICSMPS, MZU hnen atanga inlawmna thusawi ngiahthlak a nih bakah Prof. Dibakar Chandra Deka, Vice Chancellor, MZU pawhin thu a sawi a. Hemi hnu hian Dr. M. Sandhyarani Devi, Organizing Secretary, ICSMPS, MZU chuan lawmthu sawiin hun a hmang bawk a ni.