Muallungthu Polling Station-a Presiding Officer chu Dan kalha a chet avangin a hna atangin suspend a ni

Mizoram Legislative Assembly inthlanpui neih ah Aizawl South-III huamchhunga Muallungthu Polling Station-ah Vote thlak that a tul avangin Election Commission of India thupek angin Agriculture Department-a Secretary chuan an Department-a Deputy Director Lalremmawia Colney Suspend Order chu Inrinni (Nov. 11, 2023) khan a tichhuak.

Muallungthu Polling Station-a Presiding Officer Lalremmawia Colney a hna atanga chawlh lailawk tir a nih chhan hi Muallungthu Polling Station a dik lo taka a thiltih avanga Election Commission of India thupek anga tih an nih thu Agriculture Department Secretary C. Lalzahngova chuan thupek a tihchhuahah a tarlang a. A thiltih ni a puh hi Agriculture Department chuan a chhuichiang (Departmental Proceedings) dawn a, chumi chhung atana lo chawlhtir lailawk chu a ni a. Election Commission hian Lalremmawia Colney hi a hna (Official Duty) a tih that loh avang leh document a phuahchawp (fabrication) vanga hremna lek tura kalpui ta an nih thu an tarlang bawk.

Thudawn danin November ni 7, 2023-a Mizoram Assembly inthlan ni khan mipuiin vote an thlak hmain he Polling Station a duty-te'n EVM hmangin vote an thlak chhin (Mock Poll) a. Chuta vote tlate chu nawtreh leh lovin zing dar 7:00 atangin mipuite vote an thlaktir chhunzawm nghal a. He thil fel lo, Polling Station-a vote awm zat aia tam vote tla ta hi thup tumin Presiding Officer Lalrem-mawia hian a chunglama thuneitute hriattir lovin Polling Station a vote awm zat chu a lo ziah belh a. Vote nei hming (signature) lem a lo ziah chu man chhuah a ni ta a ni.

A hna atanga Lalremmawia Colney chawlhtirna thupek hi Inrinni khan tihchhuah a ni a. A chungchang chhui chianna zawhfel a nih hma chuan Aizawl khawpui a awm tur leh thuneitute phalna lo chuan Aizawl chhuahsan lo tura tih a ni a. A hna atanga chawlh lailawk tir a nih chhung hian a hlawh chanve a la ang a. Hna dang a thawh loh chuan hetiang hian kalpui a ni dawn a ni.