Serchhip leh Keitum inkar-a Saza chhar thiin a pum-ah Silai-a kahna hnuhma hmuh a ni
Thudawn danin nimin chawhnu dar 1:30 velah khan Serchhip leh Keitum inkara kawng siam hna thawka awm mek hnamdang te chuan UD&PA Department bawlhhlawh paihna leh Vety Tuikhur inkar ah kawng chhak lam ft. 20 vela sang atanga Saza rawn tla hi hmuin a theih anga an buaipui hnuah Forest Department hotute pawh hriattir nghal an ni a, Department mithiam ten Saza an chharna hmun an va thlen hi chuan Saza hi a lo thi hman tawh tih Forest Department-a thawktute chuan an sawi.
He Saza thi ta ruang hi Serchhip-ah rawn lak niin AH&Vety Department-a mithiam te chuan a ruang hi an Postmortem nghal a. Dr H. Vanlalrawna chuan, he Saza hian a pumah silai kahna hliam a nei tih sawiin, a hliam hi thihpui tham a ngaih loh thu leh a pum-ah thi a tlin thu a sawi a. He Saza hian no pai mekin, no neih pawh a hun tep (last stage of pregnancy) niin inthazo tawh lo a nih avangin miin silai a an kah avanga hlauthawng tlanchhia chuan a naupai a hram tawh nen kham-ah hian a chesual ta niin a rin theih tih a sawi bawk a ni.
Tarlan tawh angin Oct. 31, 2023 khan Thenzawl DFO Lalbiakchama Chawngthu chuan Serchhip leh Keitum inkar ah hian Mizoram State Animal, Saza in awmhmun a khuar mek thu leh hei hi humhalha kutthlak lo tura mipuite ngenna a lo tichhuak tawh a. Saza hi Wildlife (Protection) Act-1972 in humhalhna sang ber a pek, Schedule-I a awm a nih thu leh Dan kalha lo kap emaw an awm chuan kum 3 atang kum 7 thleng lung In tantir leh Rs. 10,000/- thlenga chawi tir theih a nih thu a lo tarlang tawh a. Heti chunga State Animal kan neih tlem tawh tak maiin kut a la tuar fo mai chu a lungchhiatthlakin, Mizo mipuiten nungcha humhalh chungchangah hmasawnna tur kan la ngahzia ti langtu a nih thu Thenzawl DFO chuan sawiin, Thenzawl Forest Division-a thawktute pawhin thil sual ti tute hi theihtawp chhuahin an chhui mek tih a sawi a. He pawikhawihna chungchangah hian Serchhip Police Sttion-ah FIR thehluh a nih thu a sawi bawk a ni.
Comments
Post a Comment