Observer pathum ban zingah Mizoram a mi a tel

Election Commission of India chuan Assembly Inthlanpui neih meka Observer mi pathum te chu Inthlanpui kaihhnawiha Dan siam te an bawhchhiat avangin Observer an nihna atangin a ban a, an aiawh turin midang dah an ni.

ECI hian Chhattisgarh leh Madhya Pradesh-a General Observer pahnih leh Mizoram-a Expenditure Observer pakhat te lakah hremna hi lekin an khawsak dan dik loh leh nungchangin a zir loh bakah Code of Ethics bawhchhiat vangin Observer an nihna an hlihsak niin thudawnna chuan a tarlang a. Chhattisgarh-a Dantewara Assembly Constituency-a IAS Officer Franklin Laltinkhuma aiah IAS Officer dang Anurag Patel chu General Observer atan dah a ni a. IAS Officer R. Girish chuan Madhya Pradesh-a Seoni Malwa leh Hoshangabad Assembly Bial-ah General Observer hna thawkin IAS Officer Udaya Narayan Das a thlak anga. Mizoram chhunga Lunglei District-a Expenditure Observer, Gaurav Awasthi IRS chu thlakin an Service bu-ah pawh he thil hi chhinchhiaha ziak lang turin ECI chuan thu a pek thu an sawi.

Lunglei South, West Tuipui leh Thorang bial-a Expenditure Observer Gaurav Awasthi IRS hi inthlan a duty, a bikin Candidate-te sum hman dan endiktu Officialte’n an ning hle a. Candidate-te Election Agent-te bakah Official-te a zah pah lovin engmah thiam lo anga a chhuah bakah hmusit taka ankhum a ching niin thudawnna chuan a sawi bakah Returning Officer-te pawh rilru hrehawm takin a siam niin an sawi a. Hei vang hian Lunglei District Election Officer hnenah a huhovin lehkha thehluh a nih hnuah Election Department-in lo buaipui zuiin Election Commission of India chuan hetiang hian hma a la ta nia thudawn a ni. Expenditure Observer te hian Inthlan Vote chhiar zawh hnu ni 30 chhungin Candidate te sum hman dan felfai taka an chinfel a la tul dawn a ni.a