Mizo Language Development Board (MLDB) thutkhawm hmasa ber neih a ni

Mizoram sawrkarin Mizo tawng hmasawnna leh humhalhna kawnga hma la tura a din, Mizo Language Development Board (MLDB) thutkhawm hmasa ber chu nimin khan Aizawl-a Directorate of School Education Committee Room-ah neih a ni.

Nimin-a MLDB thutkhawm hi an Chairman R. Lallianzuala chuan kaihruaiin Mizo tawngin hma a sawn zelna tur leh awmze nei zawka humhalh a nih theih nana MLDB din a lo ni ta chu Mizoram leh Mizo mipuite tan a hlut thu a sawi a. “Hun lo kal zel tur atan Mellung pawimawh leh chhinchhiah tlak tak Mizoram sawrkar in a phun a ni,” tiin he Board din tura Mizoram sawrkar hmalakna hrang hrang te chhuanawm a tih thu a sawi a, khawvel hmasawnna thang chho zelah kan tawngin hma a sawn ve zel a ngai a, chumi rual chiah chuan nasa lehzuala kan tawng humhalh tura hmalak a ngaih thu a sawi bawk.

Nimin-a MLDB thutkhawm ah hian Member leh sawm bik (Cco-optd member) te an tel tha hle a, an thurel pawimawh zual zingah Mizo tawngin hma a sawn zel theih nana tinzawn bik neia hma latu tur Sub-Committee hrang hrang siam te leh Mizo A AW B (Orthography) siam rem chungchang te, MINECO huamchhunga MLDB Office hmun tur sawrkar-ah dil chungchang te a tel a. Tuna Mizo A AW B kan hman meka 'NG' awmna hmun hi tihdanglam a, 'N' dawtah, 'O' hmaah awm se a tha em tih te uluk taka ngaihtuah a ni bawk. Meeting vawi 2-na chu kum 2024 kumtir lamah neih leh tura ruahman a ni.

Mizoram sawrkar chuan September ni 29, 2023 khan thuneihna sang tak nei, Mizo Language Development Board (MLDB) Member turte hi kum 3 chhung atan a ruat a, Chairman leh Secretary bakah Member mi 7 leh Ex-Officio Members pathum an awm a. MLDB din a nih theih nan hian ‘Mizo Language Development Board (MLDB) Bill, 2022’ chu March 10, 2022-ah Mizoram State Legislative Assembly chuan a pass a, Mizoram Governor in March 15, 2022-ah pawmpuina hming ziah hnanin, Mizoram Gazette-ah March ni 29, 2022 khan Mizo Language Development Board Act, 2022 chu hman theih tura tihchhuah (publish) a lo ni ta a ni.

Hemi hnu kumin February 6 khan MLDB Office thar luahluhna leh hlanna hun hman a ni a, tunah hian All India Service Transit Building-2, MINECO a mi chu Office atan luah mek a ni bawk.

Comments

Popular News (Last 30 Days)

Serchhip DCSO sawn a ni