Assembly Inthlanpui ah Vote za zela 80.43 tlain Serchhip District chu Vote tlak thatna ber District a ni

Mizoram Legislative Assembly Inthlanpui neih a Vote tlak dan kimchang hriat theih ni tawhin State pumah Vote za zela 80.43 a tla a. District hrang hrang zingah Serchhip District chu Vote tlak thatna ber niin za zela 84.75 a tla a, Postal Ballot tlak dan hriatchian a nih hnuah hei hi la pung leh hret tura ngaih a ni.

General Election to the Mizoram Legislative Assembly, 2023 atana Vote thlakna hi niminpiah zing dar 7:00 atang khan State pumah neih niin nizan hmasa dar 11:50 khan tluang taka zawhfel a ni a, Mizoram District 11-a Assembly Constituency 40-a Polling Station 1276-ah te boruak muanawm tak hnuaiah mipui ten Vote hi thlakin Vote thlak zo hnuhnung ber chu Marpara South Polling Station, Lunglei District a ni a, Inthlanpui a Vote thlak ni-ah hian Vote za zela 60.43 a tla nia chhinchhiah niin Scrutiny of Form 17A chu nimin khan neih a ni a, hemi hnu hian vote tlak dan dik tak a hriattheih tawh anga. Hei bakah hian November ni 6, 2023 thlenga chhinchhiah danin Home Voting leh Postal Ballot hmanga vote tla 15,061 a awm tawh bawk a ni.

Tun tuma Assembly Inthlanpui-ah hian District hrang hrang zingah Serchhip District chu Vote tlak thatna ber niin Vote za zela 84.75 a tla a, Assembly Bial hrang hrang zingah 27-Tuikum (ST) AC chu Vote tlak thatna ber ni bawkin Vote za zela 87.32 a tla bawk a, 9-South Tuipui AC huamchhunga Polling Station pahnih, Voters 116 awmna 29/5-Aithur Polling Station leh Voters 106 awmna 29/22-Lungpuitlang Polling Station-ah vote nei zawng zawngin vote thlak vekin Vote tlak thatna ber Polling Station an ni bawk a ni.

Tun tuma Inthlanpui neih ah hian Vote thlak hma a Mock Poll neih atanga vote thlak zawhfel thlenga EVM chhia report dawn zat chu BU 49, CU 46 leh VVPAT 139 a ni a, heng khawl chhiate hi rang taka thlak nghal zel a ni a, vote thlak that (Re Poll) ngai a awm lova, tluang taka vote thlak zawhfel a ni. Vote thlak zawh fel hnu hian Polling party-ten tihfel ngaite an buaipui hnuah District Hqrs-a Receiving Centre an pan leh nghal a. Vote thlakna atana hman EVM te hi District Hqrs. tina Strong Room siam ah te venhimna tha tak hnuaiah vote chhiar a nih hma chu dahthat a ni dawn a ni.

Election Department chuan ECI duan inkaihhruaina te, Supreme Court thupek leh Dan hrang hrangte tha taka Political parties, Candidates leh mipuite’n an zawm avangin lawmthu an sawi a. Vote thlak tura mipui zirtir kawnga thahnemngai taka thawktu zawng zawngte chungah lawmthu sawiin, Inthlanna hlawhtling tak buatsaih a nih theih nana hma latu Sawrkar hnathawk leh a bik takin mahni dikna leh mawhphurhna hlentu khua leh tui vote thlak zawng zawngte chungah lawmthu an sawi bawk a ni.