ECI hotute hovin inthlanpui inbuatsaihna sawiho a ni

Inthlanpui nei tur ramchhunga State 5- Mizo-ram, Chhattisgarh, Madhya Pradesh, Rajasthan leh Telangana bakah an thenawm State 12 te chu chu nimin khan biakhmuh theihna hmangin Chief Election Commissioner (CEC) Rajiv Kumar leh Election Commissioner te chuan kawmin he hun hi Mizoram atangin Chief Secretary Renu Sharma hova lo zawm a ni.

He inkawmna ah hian Election Commission of India hotute chuan inthlan hmachhawn mai tur State te'n harsatna lian tham an nei lo leh thenawm State-te nena thawhhona tha tak an nei chu lawmawm an tih thu an sawi a a. Vote zawnna hmanraw hrang hrangte do tlan a pawi-mawh thu te, ramri kaltlanga dan lova ruihhlo, bungrua leh hmanraw dang tawlh ven leh State ramri khauh taka venhim a tul thute an tarlang a. State hotute chu inthlanna muanawm, dik leh langtlang, hlawhtling leh entawntlak lantir tum turin an chah a. Buaina leh tharum thawhna a awm loh nan leh vote tla a that theih nana thahnemngai taka hma la zel turin an chah a. Sawrkar thuneitute leh Election official-te chu re-poll a awm loh nana hma la turin an chah bawk.

He hunah hian Chief Secretary Dr. Renu Sharma IAS chuan ECI duhdan leh inkaihhruaina te zawm chunga inpuahchahna kalpui chhoh mek zel a ni tih sawiin, Mizoram chu State ralmuang tak a nih thu a sawi a, tun dinhmunah Dan leh thupek kenkawh kawngah harsatna lian tham a awm loh thu a sawi a. Thenawm State Assam, Manipur leh Tripura thuneitute nen pawh inbiakpawhtawn reng a nih thu a sawi a. Ramri ngawrh taka ven a nih thu leh campaign tawp hun atanga inthlan zawhfel thleng ramri khar tlat tum a nih thu a sawi bawk.

Mizoram DGP Anil Shukla IPS chuan inthlanna muanawm leh felfai neih a beisei thu he hunah hian a sawi a. Venhimna kawnga CAPF mamawh belh a nih thute sawiin, inthlan puan hnua Enforcement Agency-te hmalakna hrang hrangte a tarlang bawk a ni.