Assembly Inthlanpui neih tur atan Serchhip District-ah inpuahchahna kalpui zel

Karleh Thawhlehni mai-a Assembly Inthlanpui neih tura inbuatsaihna kal mekah nimin khan Serchhip-ah Polling party leh BLO te, Candidate hrang hrang Expenditure Agent te leh inthlan kaihhnawih Official pawimawh te tan Training neih a ni.
Tun thla ni 7-a Assembly Inthlanpui neih tur atan Serchhip District-ah inbuatsaihna kalpui zel niin nimin khan Serchhip DC Conference Hall-ah Candidate hrang hrang Expenditure Agent te tan Training neih leh a ni a, he hun hi Expenditure Observer Umesh Phade leh Serchhip District Election Officer David Lalthantluanga te chuan telpuiin sun vawn dan te inhrilhfiah thar leh a ni. Election Commission of India thupek angin inthlan senso atan Mizoram chhunga MLA Candidate pakhat in cheng nuai 28 aia tam sum leh pai an hmang tur a ni lo tih a ni a. Candidate te sum hman dan fel taka vawng a, ziaklut thintu tur Candidate tin ten Expenditure Agent an nei theuh a. Candidate te sum hman dan an ziahluh leh District Election Office in Shadow Observation Register a candidate te sum hman dan an ziahluh chu a inmil em tih hun bi neia en thin a ni a. Nimin-a thutkhawm ah hian Expenditure Agent ten tihsual an neih leh neih lo te endik leh niin ECI duhdan anga Accounts vawn dan inhrilhhriat nawn leh a ni bawk.


Nimin vek khan Serchhip District chhung Polling Station hrang hranga Booth Level Officer (BLO) te tan Serchhip DC Conference Hall-ah Training buatsaih a ni bawk a, he hun hi Serchhip Election Officer Lalrinsanga Hnamte chuan kaihruaiin 26-Serchhip (ST) AC-a ARO leh SDO (Sadar) Rebecca Laldinmawii Hrahsel, 27-Tuikum (ST) AC-a ARO leh SO Gaston Vanlalhriatpuia leh Election Officer Lalrinsanga Hnamte te chuan Vote thlak ni a BLO te mawhphurhna chi hrang hrang chipchiar takin an zirtir a ni.

Serchhip District chhungah hian Pollling Station 88 awmin heng Polling Station tinah hian BLO hi pakhat zel an awm a, nimin a Training ah hian BLO te hnenah Voter Slip pekchhuah nghal a ni a, heng te hi BLO te hian an huamchhung theuh ah an semchhuak dawn a, hei hi Vote thlak ni-ah Vote thlak turte tan Electoral Roll-a an hming awmna leh an number te zawnchhuahna atan hman tur a ni dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar