Serchhip Bialtu MLA in MHIP In sak thar a hawng

Serchhip Vengchung Branch MHIP in MLA Fund leh sum dang hmanga ‘MHIP In’ an sak chu nimin khan a hawnna an nei a, he hun hi Serchhip bialtu MLA Lalduhoma chuan a hmanpui a ni.
MHIP In sak thar lawmna puala Inkhawm Zo-luti Hall, Serchhip Vengchung-a neih ah Bialtu MLA Lalduhoma chuan Serchhip Bial-a MLA Fund hmanga hnathawh chu a tha thawkhat tih sawiin, Serchhip Vengchung Branch MHIP ten sum hmanbang awm lo leh anmahni sum sen belha hna tha tak an thawk chu lawmawm a tih thu a sawi a. Dik taka sum hman a nih chuan hna tha tak a thawh theih tih sawiin, dinhmun tha zawka an din theih chuan nasa zawka hmalak tum a nih thu a sawi a. Serchhip Vengchung chu Serchhip neitu an ni tih pawh sawiin, Veng chhunga pawl hrang hrang ten inlungrualna tha tak an nei chu fakawm a tih thu a sawi a. Serchhip Vengchung huamchhungah Heritage Centre tha tak din a nih tur thu leh an hmalakna te tarlangin, harsatna hrang hrang an tawh hnuah a puitlinna hmel an hmuh chhoh zel thu leh Vengchung mipuite tan malsawmna nasa tak a nih tur thu a sawi bawk.


Ram changkang apiangah hmeichhia te dinhmun a sang thin tih pawh Bialtu MLA chuan sawiin, Inthlanpui neih zawh takah Hmeichhia ten Vote an thlak tha chu lawmawm a tih thu a sawi a. Corruption do tura MHIP Member te chu sawmin, mahni Inchhung atangin corruption do a tul thu leh Pathian malsawm tlaka eizawnna kawng dap a pawimawh thu te a sawi bawk.

Nimin-a MHIP In sak thar hawnna hun hi Serchhip Vengchung Branch MHIP Vice President PC. Lalrintluangi chuan kaihruaiin Secretary R. Lalnunpuii chuan Report a pe a. MHIP In hi kumin March 28 khan a sak hna bul tanin tha 200 vel sen a ni a, MLA Funs cheng nuai thum bakah MHIP sum sengin a vaiin Rs. 4,09,720 sen a ni a. YMA leh MUP te pawhin he In sak hna hi an thawh pui bawk a ni.a

Comments

Popular News (Last 30 Days)

Bawngchawm tlang khualbuk rawktu nia hriat mi 2 man