ZRM in Independent in MLA inthlan chuh an tum

Zo Re-unification Movement (ZRM) chuan kumin kumtawp lama Mizoram MLA inthlanpui lo awm tur chu Independent anga chuh an tum tih an sawi.

Inrinni khan Aizawl Press Club-ah chanchinbumite kawmin Zo Re-unification Movement (ZRM) Convener T. Lalhmachhuani (Mimi) chuan he thu hi a sawi a. An thiltum zingah Zofate mahnia ro inrel tura hmalak, Pathian lalram a taka din te, Khawvel hmun hrang hranga Zofa awmte impumkhata kan awm theihna tura Council/Forum din, Zofate intodelhna tura hmalak, Education & Health lama hmasawnna atana ke pen leh khawvel hnam tinte hnena Chanchintha hrilh te a ni tih a sawi.

Zawhna chhangin ZRM Covener T. Lalhmachhuani chuan, “Independent in kan ding dawn a, tunah hian candidate tur kan zawng mek a. Lalpa min pek ang zelin kan bial chuh zat tur leh Chief Minister tur pawh kan la tifel dawn a ni,” a ti a. Tuna Mizorama sawrkarna chelh mektute chu an sawrkar nawn tawh dawn lo tih sawiin, “Mizoram tan hian Independent Lalpa’n min pe ang tih ka ring tlat a ni,” a ti bawk.

ZRM hian innghahna atan Johana 8:32 “Tin thutak in hria ang a, thutak chuan bawih a ban ang che u,” tih chu an hmang dawn niin a sawi bawk.