Bairabi-Sairang inkar Rel kawng siam hna thla 6/7 vel thawh belh a ngai dawn

Bairabi leh Sairang inkara Rel kawng siam mek chu December, 2023-ah hawn tum ni mah se, kumin August 23-a Bridge No. 196, Sairang Zero Point bula Lei dawh lai chim vangin thla 6/7 vel hun a duh belh dawn a, hei vang hian a hawn hun pawh a tlai phah dawn.

North Eastern Frontier Railways Consultant Hrangtawna, IRTS (Rtd) sawi danin, tun dinhmunah hna ngawrh taka thawh mek a ni a, hetihlai hian lei dawh chim ta hmanruate chu a thar vek a siam a ngaih dawn avangin thla ruk atanga thla sarih vel hun a duh belh a rinawm tih a sawi.

Prime Minister Narendra Modi-a’n November 29, 2014-a lungphum a phum, Bairabi-Sairang Rel kawng tur hi KM 51.38-a thui a ni dawn a, a tirah cheng vbc. 2,384.34 ruahman niin zawh hun tur chu March, 2020 a ni a. Amaherawh chu harsatna eng eng emaw a awm avangin tunah chuan sum senso tura tih chu cheng vbc. 5,000 a ni tawh a, a zawh hun tur pawh December, 2023-ah sawn hlat niin Prime Minister hawntir tum a ni a, tunhnaiah Lei dawh a chim vangin hawn theih a ni dawn ta rih lo a ni. Thudawnna in a sawi danin tunhnaia Rel kawng siam mek Lei dawh chim chhan chu Railways thuneitute hmalakna angin chhui zawh a ni tawh a, an chhuina Report erawh an la dawng lo.

Bairabi-Sairang Rel kawng hi a lian chi (broad gauge)-a siam a ni a, Hortoki, Kawnpui, Mualkhang leh Sairang-ah te chawlhhmun (Station) siam a ni dawn a. Rel kawngah hian Lei 196 dawh a ni dawn a, Lei sei ber chu KM 1.04 (meter 1,042)-a sei tur niin dawh mek a ni a. Lei ban tur bik chu hmun pakhata phun mek bak chu phun zawh vek a ni tawh thung. He Rel kawng-ah hian Leiverh (tunnel) 23 awm tur chu verh zawh vek a ni tawh a, a sei ber chu KM 1.733 (metre 1,733) a ni a, Lei dawh tur zawng zawng sei zawng belh khawm chu KM 7 leh metre 27 a ni a, leiverh 23 sei zawng belhkhawm chu KM 9 leh metre 9 a ni thung.

Bairabi-Sairang inkarah hian mihring phur Rel tlantir tur niin darkar khata KM 100-a chak thlenga tlantir a ni dawn a, bungraw phur chu darkar khatah KM 65 thlenga chaka tlantir theih a ni dawn thung a ni.

Sairang atanga Bairabi inkar hi darkar khat chhung vela thleng thei tura ngaih a ni a, Sairang atanga Guwahati chu darkar 16 vela thlen theih tura chhut niin hei hian chawlhhmun hrang hranga din hun chhung tur a huam tel bawk a ni.