Zirlai ten Sesah lui thianfai

Mizoram-a Faina Hapta hman mek pualin nimin khan Govt. Serchhip College-a zirlaite chuan Serchhip Dinthar Veng-a Sesah lui kawr thianfai in hnatlang an nei.
He hnatlang hi UD&PA Department hnuaia Swachh Bharat Mission (Urban) hmalakna hnuaiah neih niin Govt. Serchhip College-a Eco Club member te leh NSS Volunteer mi 40 vel zet thawkin College-a NSS Programme Officer leh Eco Club Green Teacher ten an ho bawk a. Serchhip khawpui chhunga luang Sesah lui kawr leh a chhehvel-a bawlhhlawh tawih theilo paih chi hrang hrang chharkhawmin heng te hi a paihna tur hmun a ruahman ah UD&PA Department Motor hmangin an paih a ni.

Govt. Serchhip College-a zirlaite hian kum dangah pawh Sesah lui thenfai hnatlang hi tum engemaw zat an lo nei tawh a, hetianga helai hmuna bawlhhlawh te an chharfai thin hnu hian helai hmuna bawlhhlawh paih te pawh a tlem tawh hle a ni.