Serchhip-ah UPC LAD General Conference nei tan
UPC (NEI) LAD General Conference vawi 45-na hmang tur hian nimin khan Palai te chuan Serchhip rawn thleng khawmin khawmpui thlengtu te hian Palai 2000-2500 vel rawn kal tura beisei a nih thu an sawi a, ‘Thlen chin atanga hmasawn’ tih thu Thupui atan hman niin nizan khan Conference hawnna neih a ni a, Vawiin chawhma dar 10:00 atangin Rorel Inkhawm neiin zanin atanga naktuk Pathianni zan thleng Inkhawm neih zui a ni dawn a ni.
Thudawn danin LAD General Conference vawi 45-na hi ruahmanna hmasa ah chuan Manipur-a nei tur niin amaherawh chu tualchhung buaina a thlen tak avangin Serchhip-ah hian neih tura sawn a ni a. Pandal sakna chungchang ah harsatna a awm avangin Serchhip P&E Veng-a UPC Biak In chu Pandal sak chilhin hetah hian khawmpui hi neih a ni dawn ta a ni.
UPC (NEI) hnuaiah hian District 12 awmin Mizoram chhungah Aizawl East, North Mizoram, Central, Lawngtlai West, Chhimtuipui leh Lunglei District bakah SE Nagaland, Chandel, Churachandpur, Imphal, Barak leh Tripura District te a huam a ni.
He khawmpui neih a nih avanga mipuite him zawk nan leh Motor tlan dan a felfai zawk theihna turin Serchhip SP chuan Serchhip P&E Veng kaltlanga AOC Veng leh IOC Veng inkara lirthei tlan dan tur ruahmanna a siam thar a. Hemi ang hian Vawiin (Oct. 7, 2023) zing dar 9:00 leh dar 10:00 inkarah leh tlai dar 5:30 leh zan dar 6:30 inkar ah helai kawng hi One-Way tur a ni dawn a. Naktuk Pathianni-ah pawh zing dar 9:00 atanga dar 10:00 leh tlai dar 5:30 atanga dar 6:30 thlengin One-Way tur a ni bawk a. Hei hian Two Wheeler te a huam dawn lo thung a ni.
Comments
Post a Comment