Serchhip DC hovin inthlanpui-a sum hman dan tur leh Nomination thehluh dan chungchang inhrilhfiah a ni
Serchhip DC Meeting Hall-a he hun buatsaih ah hian District Bawrhsap leh District Election Officer David Lalthantluanga chuan Election Commission of India in inthlanna fel leh thianghlim a awm theihna tura dan leh inkaihhruaina a siam zingah Expenditure Monitoring hi a pawimawh ber te zinga mi a nih thu sawiin, Candidate leh Political Party te sum hman dan sawrkarin vilin, State pawn atangin a viltu tur bik ECI in a ruat Expenditure Observer te an lo kal dawn thu leh Candidate ten an sum hman te uluk taka an chhinchhiah felfai a tul dawn thu a sawi bawk.
He thutkhawm ah hian Political Party hrang hrang- BJP, INC, MNF leh ZPM aiawhte leh MJA aiawhte telin Assembly Inthlanpui neih tura Expenditure Monitoring changtu Nodal Officer James Lalnithanga, Deputy DEO chuan Inthlanpui neih hun tur puan atanga ni 3 chhunga tihtur pawimawh duan lawk hrang hrang awm anga he hun hi buatsaih a nih thu sawiin, kum 2018 Inthlanpui ah Candidate pakhat in cheng nuai 20 vel an hman theih laiin kumin ah erawh chuan cheng nuai 28 thleng an hman theih dawn thu sawiin, a hniam lamah erawh bituk a awm loh thu a sawi a. Inthlanna chuh turte reng reng in Nomination Paper an thehluh hmain Bank Account thar an hawn a tul thu leh Bank te pawh hetianga Account hawng tur an awm chuan lo ngai pawimawh hmasa tura hriattir an nih tawh thu a sawi a. Bank hotute chu inthlanpui neih chhungin inthlanna boruak thianghlim a awm theihna tur atan leh Vote inlei tumna leh thamna inpek tumna te venna atan Bank Account-a sum che vel uluk taka lo vil tura hriattir an nih thu a sawi a. Hetiang kawnga rinhlelh kai an awm a nih chuan Observer hova la ngaihtuah tur a nih thu a sawi a. Candidate te hian Rs. 10,000/- hnuailam ah a sumfai-a an hman theih laiin hemi chunglam ah erawh cheque an hman a tul dawn thu a sawi bawk.
Deputy DEO chuan tunah hian Flying Squad te chuan hma an lak tan tawh thu leh Static Surveillance Team (SST) te pawh Zirtawpni atang hian an Duty tan dawn thu sawiin, heng Team te hian an Report te thehlutin Accounting Team ten sum hman dan hi an lo chhut dawn thu a sawi a. Candidate te sum hman dan hi tum thum enfiah a nih dawn thu leh a hnuhnung ber chu Vote chhiar atanga ni 25-na ah neiin hetah hian Candidate emaw, an aiawh kal duh lo an awm a nih chuan kum thum thleng inthlan chuh thei lo tura hrem theih an nih thu a sawi bawk.
He hunah hian Media Certification and Monitoring Committee (MCMC) Member Secretary leh Serchhip DIPRO Lalnunmawii pawhin MCMC in Candidate te senso chhut dan tur an lo ruahman tawh chu tarlangin, hemi mil hian Candidate tie sum hman dan Expenditure Monitoring Team in an vil tur thu a sawi a. MCMC chungchang ah Electronic Media - TV/Radio leh Social Media (Facebook, Whatsapp, Instagram, X, Youtube leh a dangte) kaltlanga Video, Audio, Flyer, Poster leh a dangte hmanga Political advertisement zawng zawng Pre-Certify hmasak a tul thu leh a dil dan tur kalhmang te a sawifiah a. Print Media-a chuan Pre-Certify ngai lova kal theih a nih thu a sawi a. Serchhip DIPRO Office-ah Media Centre siam a nih thu pawh a sawi bawk.
Serchhip SDO (Sadar) leh Serchhip Bial-a ARO Rebecca Laldinmawii Hrahsel chuan he hunah hian Inthlan chuh tumte tana Nomination File dan tur leh File dawna thil pawimawh hrang hrang kimchang takin a hrilhfiah a. Agent inruat dan te, Form fill up dan tur te sawifiahin form pawimawh te hi semchhuah nghal a ni bawk.
Comments
Post a Comment