Serchhip District Secondary School Sports hawnna nei
Tunkar chhung awh tur Serchhip District Secondary School Sports hi Serchhip District Education Officer (DEO) Lawmawma chuan hawngin zirlaite chu taksa hrisel an neih theihna tura ruihhlo laka fihlim turin a chah a. Ruihhlo in kan thalai te a luhchilh nasat thu sawiin, thingtlang hmun kilkhawr zawk thlenga ruihhlo avanga harsatna kan tawh thu leh a dona atan State Level atanga Village Level thlenga hmalak a nih thu te a sawi a. Ruihhlo laka fihlim tura zirlaite a fuih bakah nu leh pa thu awih tur leh infiamna leh zirna kawnga hlawhtling turin a duhsakna a hlan bawk a ni.
Serchhip District Secondary School Sports neih mekah hian Serchhip District chhunga High School hrang hrang 21 atangin zirlaite telin, Football, Volleyball, Badminton, Table Tennis, Javelin Throw, Shot put leh Long Jump bakah intlan-siak hrang hrang te mipa leh hmeichhia (Boys & Girls) ah inelna an nei anga, a tithate chu kumin December thla a Mizoram pum huap Secondary School Sports-ah Serchhip District aiawhin an tel dawn a ni.
Comments
Post a Comment