MLA atangin Speaker Lalrinliana Sailo bang in tunhnaiah MLA 8 ten banna an thehlut ta

Mizoram Legislative Assembly Speaker Lalrinliana Sailo chuan nimin khan MLA atanga banna a thehlut ve leh ta a, BJP Ticket in MLA inthlanpui a chuh dawn nia thudawn niin tunhnai ah MLA Inthlanpui kaihhnawih ah MLA 8 ten banna an thehlut ta a ni.

Mizoram Legislative Assembly Speaker Lalrinliana Sailo hian Mizoram Legislative Assembly Inthlanpui lo awm turah a bial ngai chuh leh turin an party (MNF) atangin Ticket a chang lo a, hemi hnu nimin khan MLA atanga banna hi Deputy Speaker H. Biakzaua hnenah thehlutin Commissioner & Secretary Lalhmahruaia Zote chuan a banna lehkha hi a lo dawn sak a ni. Lalrinliana Sailo hi Tuichang Bial atanga tum hnih Congress Ticket-a thlantlin ni tawhin kum 2018 MLA Inthlanpui ah khan Chalfilh bial-ah MNF Ticket-a thlantlin leh a ni a, nimin-a banna lehkha a thehluhna ah hian BJP hruaitu ten an tawiawm a, Vawiin tlai hian BJP-ah lawmluh a ni dawn nia thudawn niin Assembly Inthlanpui lo awm turah Mamit District chhunga Bial pakhat ah a ding zui dawn nia hriat a ni a, khawi bial nge tih erawh sawi chian ala awm lo thung a ni.

Heti hian Mizoram Legislative Assembly dinglai-ah MLA 8 ten MLA atanga banna an thehlut ta a, MLA zinga banna thehlut hmasa ber Palak Bialtu MLA KT. Rokhaw chuan tun thla ni 3 khan MLA atanga banna thehlutin ani hi kum 2018 khan INC Ticket-a thlantlin niin MNF Ticket in a bial ngai ah hian a ding leh dawn a. October 6 khan Siaha bialtu MLA Dr. K. Beichhua chuan banna thehlut ve lehin ani hi kum 2018 khan MNF Ticket-a thlantlin ni mah se MNF atanga ban niin a bial ngai ah hian BJP Ticket in a ding leh dawn niin a lang a. Kum 2018-a Independent a thlantlin MLA 5- Aizawl West-III Bialtu MLA VL. Zaithanzama; Aizawl North-II Bialtu MLA Dr. Vanlalthlana; Aizawl South-II Bialtu MLA Lalchhuanthanga; Aizawl South-I Bialtu MLA C. Lalsawivunga leh Aizawl North-I Bialtu MLA Vanlalhlana te chuan tun thla ni 10 khan MLA atanga banna hi thehlut lehin anni pawh hi ZPM Ticket in an bial ngai-ah theuh an ding leh dawn a. Nimin khan Chalfilh bialtu MLA Lalrinliana Sailo hi a bang ve leh ta a ni.

MLA-a thlantlin te hian thlantlin an nihna Party ni lo ah an term tawp hma-a MLA chuh tura Nomination an File chuan MLA atanga ban theih an ni a. Ban an nih chuan pension pawh an la thei lo nia thudawn a ni a. Hei vang hian thlantlin an nihna party ni loa candidate nih leh tum emaw, Independent-a thlantlinte chuan ban an duh a nih loh chuan Nomination an file hmain MLA atanga an ban a ngai a ni.