Serchhip-ah SW&TA Minister in DSWO Office leh DPO (WCD) Office thar te a hawng
Heng Pisa thar pahnih hawnna puala Inkhawm tawi Serchhip Bukpui hmun-a nimin a neih ah Social Welfare & Tribal Affairs Minister Er. Lalrinawma chuan Department Office thar hawn chu thil hautak a nih thu leh Office thar hawn a nih theihna tura thil buaipui ngai a tam thu sawiin, Office thar hawn a nih theihna tura chak taka hmalatute chungah lawmthu a sawi a. Sawrkar Department pawimawh tam tak zingah mihring mamawh kimna leh Office pawimawh ber te zinga mi, District Social Welfare Officer (DSWO) Office leh District Programme Officer (DPO) Office thar hawn a ni thei ta chu lawmawm a tih thu sawiin, “Serchhip District chuan rahbi thar pawimawh tak a chuangkai a ni,” a ti a, thinlung taka a lawmpui thu pawh sawiin, tluang taka Office kalpui chhoh a nih theih nan duhsakna a hlan bawk.
Kum Upa leh Tar te tanpuina sum lo kal bahlah leh zauh thin chungchang pawh SW&TA Minister chuan he hunah hian a sawi lang a. Hei hi Central sawrkar lamin inkaihhruaina (Guideline) an siam danglam vang a nih thu a sawi a. India ram hnam tinten kan hnam nun leh culture kan inzahtawn sakna tura hmalakna chu sawrkar laipuiin a ngai pawimawh hle tih pawh sawiin, State Sawrkar pawhin theihtawpin tan a la a, he hmalakna a hlawhtlin theih nan mipui mimir kan pawimawh hle a ni, a ti bawk.
Serchhip-a DSWO Office leh DPO Office hawnna programme hi Serchhip District Bawrhsap David Lalthantluanga chuan kaihruaiin kalkhawmte lawmna thu a sawi a. Serchhip District in District Social Welfare Officer (DSWO) Office thar a nei ta leh District Programme Officer (DPO) Office thar an luah lum dawn ta chu lawmawm a tih thu sawiin, Serchhip District mipui te tan hmasawnna bung thar pawimawh tak a nih thu a sawi a. Hemi atana hmalatu SW&TA Minister chungah lawmthu a sawi a ni.
Nimin-a heng Pisa thar hawnna hunah hian Social Welfare & Tribal Affairs Director Dr. Lalhriatzuali Ralte IAS chuan Serchhipa District Social Welfare Officer (DSWO) Office & District Programme Officer (DPO) Office hawng tura hma an lak chhoh dan sawi bakah an Department hmalakna leh hnathawh dan kalphung tlangpui te a sawilang bawk a. SW&TA Deputy Director Dr. R. Lalnunmawii’n Technical Report pe in, Report atanga a lan dan chuan heng Pisa hawn thar pahnih ten an luah theih turin Govt. Bukpui M/S building hlui chu tunhnaiah chei that a ni a. Hemi atan hian cheng nuai 4 chuang sen a nih thu a tarlang a ni.
Women & Child Development hnuaia DPO Office hi nikum December thla atang khan Serchhip P&E Veng-ah mimal In luahin bul tan a nih hnuah nimin khan Office thar hawnna hi neih a ni a. District Social Welfare Officer (DSWO) Office erawh Serchhip-ah hian a la awm ngai lova, nimin khan Minister Er.Lalrinawma hian hawngin heng Office pahnih te hian Govt Bukpui M/S building hlui cheithat hi hun engemawchen an luah lailawk anga. Bukpui ramah vek hian Office building thar sa turin ruahmanna kalpui mek a ni.
Serchhip-a DSWO Office leh District Programme Officer (DPO) Office hawnna hunah hian Department-a thawktute bakah Chhiahtlang, Bukpui leh Serchhip khawtlang hruaitute an tel a. Women & Child Development Deputy Driector Sailopari’n lawmthu sawiin hun a khar a ni.
Comments
Post a Comment