Serchhip-ah National Voluntary Blood Donation Day pualin thisen pek pawimawhna inzirtir a ni

National Voluntary Blood Donation Day pualin nimin khan Chhiahtlang Higher Secondary School-ah midangte tana a thlawna thisen pek a pawimawh zia inzirtirna neih a ni.
Association for Voluntary Blood Donation (AVBD) Serchhip Branch leh Serchhip District Hospital Blood Bank tangkawpin an buatsaih National Voluntary Blood Donation Day puala hun hman hi Serchhip District Medical Superintendent Dr. ZD. Lalmuanawma chuan hmanpuiin hetiang hun hman a ni chu lawmawm a tih thu a sawi a. HIV/AIDS a kan dinhmun te tarlangin, midangte nun chhan nana thisen pe thei tura invawng tur leh an nundan te uluk taka hmang turin huna kalkhawm Zirlaite chu a chah a. HIV/AIDS laka fihlim tur leh ruihhlo laka fihlim tura midangte Zirtirtu ni zel turin a chah bawk.

He hunah hian Serchhip District Hospital Blood Bank-a Blood Bank Officer Dr. Lalnunhlima Khiangte chuan he huna kalkhawm Zirlaite hnenah Thisen pek chungchang leh HIV natna chungchang a sawifiah a. Kum 1971 atangin October 1-ah Indian Society of Blood Transfusion (ISBT) bultumin National Voluntary Blood Donation Day hi hman a nih thu leh he ni hi midangte tana thisen pe tura inzirtirna ni atan hman thin a nih thu a sawi a. Serchhip-a College, DIET leh Higher Secondary School-ah te thisen pek chungchang inzirtirna an lo neih tawh thin thu leh a tum khatna atana Chhiahtlang-a zirna In-ah hun hman a ni chu lawmawm a tih thu a sawi a. Mizoram-ah mi tlawmngai te avanga thisen mamawh ten a thlawna thisen dawn tur an la hmuh reng thu leh hei hi damlo ten tangkai taka an hman thin thu sawiin, Thisen pe tura hriat tur pawimawh hrang hrang te a sawi a. Serchhip Damdawi In in tun dinhmun ah thla khat ah thisen Unit 80-90 vel a mamawh thu pawh a sawi bawk. Serchhip Blood Bank Officer chuan tunhnaiah ruihhlo ti an tam avanga HIV kai thar an tam thu pawh sawiin, zirlai kalkhawmte chu tun atanga rilru siama ruihhlo laka inthiarfihlim tur leh karleh mai khian Chhiahtlang-ah Integrated Health Campaign neih tum a nih thu a sawi bawk.

Serchhip-a National Voluntary Blood Donation Day puala hun hman hi AVBD Serchhip Branch Vice President Laldinpuia chuan kaihhruaiin AVBD Serchhip Branch Asst. Secretary Vanlalruata Renthlei chuan AVBD te hmalakna hrang hrangte a tarlang a. AVBD Serchhip Branch President Zonunsanga Kawlni pawhin damlo thisen mamawh ten an mamawh hun ang zela thisen an hmuh theihna tura Blood Bank-ah thisen enfiah sa neih a pawimawh thu leh hemi tura thisen pek uar tura inzirtirna neih zel a pawimawh thu a sawi bawk.