ZPM in Pathian lalram sawrkar din an tum tih sawi

Serchhip bialtu MLA leh ZPM Leader Lalduhoma chuan an party an sawrkar a nih chuan Pathian lalram sawrkar an din dawn tih a sawi.
ZPM Chhiahtlang Joint Group in nimin-a Mithar lawmluhna hun Chhiahtlang Bazar Kawn-a an buatsaih a hmanpuina ah ZPM Leader Lalduhoma chuan Mizoram Politics-ah harh tharna a thlen a ngai tih sawiin, harhna hi a thlen mek thu leh thalai ten Politics an ngaihvenin ram an vei tawh tih a sawi a. ZPM Policy chu Pathian in mal a sawm nia sawiin, ni tin mithar an neih belh zel thu leh lawmawm a tih thu a sawi a, “Sawrkarna siam turin ZPM mai kan tawk lo a. Mipuite puihna tello chuan sawrkarna kan siam thei dawn lo a, mipuite puihna kan mamawh a ni,” a ti bawk.

ZPM Leader chuan ZPM a sawrkar chuan Pathian Lalram Sawrkar an din dawn thu pawh sawiin, “Kan ram hmelma leh kan ram tichhetu ruihhlo do nan leh a bawih-a tangte chhanchhuah na Budget kan dah dawn a ni,” a ti a. Mizo ten pian pun kan mamawh thu pawh sawiin, “Kan sawrkar chuan Fa pathum nei chinte chu hamthatna kan pe ang,” a ti a. ZPM chuan huapzo sawrkar an din dawn thu leh an MLA Candidate ten ‘Kan eiru lovang’ ti-a thu an tiam chu Pathian in mal a sawm thu leh mipuiten ZPM-ah rinna an nghah thu a sawi bawk. Central-ah BJP-in sawrkarna an siam lohna turin NDA thawhpui Mizoram-ah sawrkarna kan pek loh a ngai tiin he hunah hian a sawi bawk.

Nimin-a he hun hman hi ZPM Chhiah-tlang South Group President R. Lalbiakchhunga chuan kaihruaiin Tuikum bial-a ZPM Candidate tur PC. Vanlalruata pawhin thu a sawi a, ani bakah hian Inthlanpui-a Hrangturzo bial-a ZPM Candidate tur Lalmuanpuia Punte leh Aizawl South-III an candidate tur Baryl Vanneihsangi Tlau te pawhin thu an sawi bawk a ni. Nimin-a he hun hmanna ah hian ZPM Leader hian an party zawm thar mi 450 a lawmlut nia tarlan a ni.