Sapthei sawngbawlna dinna tur lungphum phum

North Eastern Council (NEC) sum cheng nuai 685 hmanga New Champhai-a Sapthei sawng-bawlna hmunpui, ‘Passion Fruit Processing Unit’ dinna tur lungphum chu Inrinni khan Champhai South bialtu MLA leh EF&CC Minister TJ. Lalnuntluanga chuan a phum.

Lungphum phumna puala inkhawm tawi neih ah Minister TJ. Lalnuntluanga chuan Champhai a kuthna-thawktu, Sapthei chingtuten an harsatna leh mamawhna te a hnena an lo thlen thin chu bawhzuiin ‘Passion Fruit Processing Unit’ hi Champhai a din tur hian Sawrkar Laipui Ministry of Food Processing te pawh tum engemawzat an dawr thu leh NEC hnuaiah tih hlawhtlin anih tak thu a sawi a. Chief Minister Zoramthanga chuan Champhai District-a Sapthei chingtute mamawhte a ngaih pawimawh thu leh he Project hi NEC project dilna zingah ngaih pawimawh (priority list) ah a dah thu a sawi a ni.

Minister in lungphum a phum tak ‘Passion Fruit Processing Unit at Cold Storage, New Champhai’ hi NEC atanga sum hmuh cheng nuai 685 hmanga ruahman tur a ni a. Civil works atan cheng nuai 185 dah niin, Sapthei sawngbawlna khawl hrang hrang leina atan cheng nuai 500 ruahman a ni bawk.