Reiek khua in Best Tourism Village an lawm

Reiek khua in ‘Best Tourism Village of India 2023’ an dawn lawmna chu Inrinni khan Reiek Community Hall-ah neih niin North East Special Infrastructure Development Schemes (NESIDS) leh Pilgrimage Rejuvenation And Spiritual Augmentation Drive (PRASAD) hnuaia Project kalpui tur lungphum te phum nghal a ni bawk.

Reiek Community Hall-a hemi puala inkhawm neih hi Tourism Minister Robert Romawia Royte chuan khuallian nia hmanpuiin India rama Best Tourism Village dawng thei tura phochhuaktute hmalakna fakawm a tih thu sawiin, he lawmman avangin hian Reiek khua chu khualzin tlawhtu leh ngaihventu an tam phah hle dawn avangin khawtlang mipuite tan la zel turin a chah a. Tunah hian khawvel pum huap Best Tourism Village inelna buatsaih mekah Reiek chu candidate Village a nih thu pawh sawiin, beiseina sang tak nen an thlir mek thu a sawi a. Reiek mipuite chu khualzin mite lo dawnsawn kawngah Best Tourism Village lawmman dawngtu an nih ang ngeiin hawihhawm chhuah zel turin a chah bawk.

He hunah hian Tourism Department-a Deputy Director Dr. R. Lalrinchhani chuan India rampum huapa Best Tourism Village, 2023 lawmman an dawnna tura Department leh Reiek mipui hmalakna tlangpui a tarlang a. Tourism Department-a Joint Secretary leh MTDA-a Member Secretary V. Lalengmawia chuan NESIDS leh PRASAD hnuaia hmalakna tur a tarlang a. Ministry of Tourism hnuaiah cheng nuai 361.27 sengin Development Works at Khuangchera Cave, Reiek and PFC (Pilgrim Facilitation Centre) at Reiek Peak hnuaiah hmalak a nih dawn thu a sawi a. He hna hi June 2025-a zawhfel tura ruahman a nih thu leh Excell Consultancy Services, Mission Veng Aizawl te'n an thawh dawn thu a sawi bawk.

Tourism Minister hian cheng nuai 560 hmanga ‘Development of Infrastructure for Tourism at Reiek and Reiek Tlang’ hnuaia DJ Consultation Services Chaltlang, Aizawl te'n July 2020 atanga hna an thawh tawh te chu a hawng nghal bawk a ni.