Education Minister in sawrkar laipui hotute a dawr

School Education Minister Lalchhandama Ralte chuan Ministry of Education thuneitute hnenah Sawrkar laipui Scheme hnuaia Mizoram zirna atana thil tul leh pawimawhte a thlen.

School Education Minister Lalchhandama Ralte hian Zirtawpni khan Ministry of Education-a Additional Secretary Vipin Kumar leh Joint Secretary Prachi Pandey te chu New Delhi-ah dawrin, Samagra Shiksha leh PM Poshan scheme hnuaia Ministry-in Mizoram tana sum a la pekchhuah loh te chu a rang lama pe chhuak thuai turin a ngen a, a ngen ang hian Ministry hotute hian tunkar a pek chhuah theih an beisei thu an hrilh a ni.

Hindi Teacher 855 awm mek, Ministry of Education-in 812-a a tihtlem chu Hindi Teacher awm zata tipung leh turin a ngen a, MoE hotute hian ziaka thehlut tur leh lo ngaihtuah an tum thuin an chhang a. Tunhnaia Adhoc Aided School atanga sawrkar School-a hlankai thar te chu Minister ngenna angin sikul dinhmun chhinchhiahna UDISE-ah siamthat an lo phalsak a, hemi behchhan hian sawrkar School-a hlankai tharte tan hian sawrkar School ten an dawn thin a thlawna sem Uniform grant, Text Book leh Composite Grant te pek ve nghal a thuphungin an lo remti a. Mizoram sawrkarin Adhoc Aided atanga sawrkar School-a hlankai te hi hriattirna a tihchhuah hunah an chanvo tur hi dil an lo phalsak a, kum thar Annual Plan siamah dinhmun thara hlankai School 180 ten an hlawkpui dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar