RD Minister in building sak thar pathum a hawng

Rural Development Minister Lalruatkima chuan nimin khan Tipa RD Block-a BDO Office sak thar leh Siaha leh Khawzawl-a District Rural Development Office (DRDO) Project Director te chenna tur Quarters sak thar te chu a hawng.

Heng Building pathum te hi RD Minister hian a Office atangin Online Mode in a hawng a, Pathian hruaina leh malsawmna changin kum 5 chhungin Rural Development Department chu theihtawpa a enkawl thu sawiin, Department hmalakna te enin, an hlawhtlinna leh mipui rawngbawl kawnga an hnathawhte chu a lungawi thlaka a hriat thu a sawi a. Hengte hi thawktute thahnem-ngaihna leh inpekna avangte leh mipui atanga thlawpna leh tawiawmna an dawn that vang chauh a nih thu a sawi bawk.

Nimin-a hawn tak Tipa BDO Office Building hi cheng nuai 182.94 senga sak niin RCC Building chhawng thum a ni a, Siaha-a DRDO Project Director Quarters hi cheng nuai 142.30 senga sak niin RCC building chhawng thum bawk a ni a, Khawzawl-a DRDO Project Director Quarters hi cheng nuai 157 senga sak niin RCC Building chhawng li a ni thung a. Nimin-a heng building hawnna ah hian Tipa BDO leh Siaha leh Khawzawl DRDO ten report an pe a ni.