Leisekawt Field zauhna tura laihzawl-ah BDO Office sak duhloh thu thlen

Serchhip-a NGO hrang hrang telna NGO Coordination Committee chuan Serchhip BDO hnenah Leisekawt Field sir-a BDO Office sak tumna chu tha lo an tih thu nimin khan an thlen.
NGO Coordination Committee hian nimin khan Serchhip RD Block-a Block Development Officer (BDO) hna belh mektu Lalrinsanga Hnamte hnenah hemi chungchanga ngenna hi ziaka thehlutin he lehkha ah hian kum 2019-a Serchhip in KTP General Conference a thlen dawn tum khan Leisekawt Field sir chu mipui vantlang ten tangkai taka an hman theihna turin thuneitu sang zawk te remtihna in lahzawl a nih thu leh Leisekawt Field hi Serchhip mipuite tan a hlu in Kohhran leh NGO hrang hrang ten Programme pawimawh an hmanna ber a ni ta zel tih an tarlang a.


Tunah hian Leisekawt Field sir, mipuite tana tangkai taka hman tura ruahman tawh, ram zawltha tak awmsa ah hian Serchhip RD Block-a Block Development Officer (BDO) Office sak tumin hmalak mek nia an hriat thu pawh an lehkha ah hian tarlangin, hemi chungchang hi NGO Coordination Committee kaihhruaina a Serchhip Town huamchhunga Village Council/Court aiawh te leh Political Party aiawh ten September 30, 2023-ah Joint Meeting neia sawiho in, he huna tel YMA, MUP, MHIP, MZP, MSU, Joint VC leh Political Party te chuan Leisekawt Field sir a BDO Office sak tumna chu tha lo tiin thuneitute hnenah hma la zui lo tura thlen nise an tih thu an tarlang a. An duhdan te ngaih pawimawh saka a tul anga hma lak sak tura ngenin, an lehkha thehluh copy hi RD Minister leh Serchhip DC te an pe bawk a ni.

Serchhip NGO Coordination Committee hruaitute chuan BDO hian tha taka lo dawng-sawngin sawihona tha tak an neih thu leh DC hnenah a lo thlen tur thu a lo hrilh tih an sawi a. An thu thlen chu a hlawhtlin ngei an beisei thu pawh an sawi bawk a ni.

Nikum lama RTI zawhna chhanna atanga a lan danin Serchhip Leisekawt Field laihzauhna atan hian SEDP hnuaiah Rs. 2,45,08,000/- ruahman niin Mizoram State Sports Council enkawlna hnuaiah Malsawm Construction & Consultancy Service te chuan a hna hi an thawk a. He ruahmanna hnuaiah hian Extension of playground by earth Cutting-ah cheng nuai 50 ruahman niin Cutting of Hillock (Earth Work) and Counterford Retaining wall atan cheng nuai 134.28 ruahman a ni bawk a, Construction of Toe wall atan cheng nuai 60.79 ruahman a ni bawk a. Tunah hian helai hmunah hian BDO Office thar sak tumin ban khur te pawh laih a ni tawh a ni.

Comments

Popular News (Last 30 Days)

LPG man bithliah thar