Myanmar raltlante biometric leh biographic data lakkhawm hun sawrkar laipui in a pawtsei

Mizoram sawrkarin Myanmar atanga Mizoram-a raltlante biometric leh biographic data lakkhawm rih loh ni se tih thutlukna a siam tukah sawrkar laipui-a Ministry of Home Affairs chuan he thil kalpui zawhfel hun tur bituk a lo siam tawh chu thla ruk (6) atan a pawtsei.

Sawrkar laipui-a Ministry of Home Affairs (MHA) chuan Mizoram leh Manipur-a Myanmar raltlante biometric leh biography data lakkhawm hna kumin September thla chhunga zawhfel tura a lo tih tawh chu nakum March thla thleng atan a pawtsei a. Hei hi Manipur tualchhung buaina vang leh Mizoram-a Assembly inthlanpui a awm dawn vang ni a hriat a ni. MHA-in biometric leh biograhphic data lakkhawm hna thawk tura tih hi Mizoram sawrkar hnathawkte an inpeih fel tawh naa kar hmasa Nilaini-a Council of Minister thukhawm chuan kalpui rih loh ni se tiin thutlukna a siam thung a. Council of Minister thutkhawm zawh hnua chanchinbumite'n an kawmna-ah I&PR Minister Lalruatkima chuan Mizorama Myanmar raltlan sing thum chuang awm mekte mit naute thlalak, an kutzia lak leh an chanchin kimchang lakhawm tura sawrkar laipui-in a rawn tih chu Council of Ministers chuan tun dinhmunah kalpui rih loh nise an tih thu a sawi a. Tunah hian inthlanpui lo awm tur avangin sawrkar hnathawkte an buai em em a, inthlan puan a nih hnu phei chuan khaw dang hawi hman lova hna an thawh a ngaih dawn avangin he hna thawh tura Ministry of Home Affairs in a rawn tih hi kalpui rih loh ni se an tih thu a sawi a ni.

I&PR Minister chuan Myanmar atanga rawn raltlante hi Mizoram amite thisen zawmpui leh unaute an nih avangin an biometric leh biographic data lo lak hi inthliarhranna angin a lang thei dawn ni a sawiin, tun dinhmunah chuan kalpui a tul rih lo an tih thu a sawi a. United Nations High Commissioner for Refugees (UNHCR) an siam lai khan India chuan a hming a ziak ve lova, hemi hnu a Protocol an siamah pawh a tel ve lo a. Hemi avang hian lainat hle mah se Myanmar atanga Zofa rawn tlan chhiate hi Refugee dinhmun dik tak pek theih an ni lo, a ti a. Sawrkar laipui-ah anmahni enkawlna tur vawi tam tak dil a ni chungin a harsa hle tih sawiin, chuti chung chung chuan a theih anga lo tuamhlawm an nih thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar