FSL-in kumin-ah thubuai 861-ah thil 12,796 endik
Mizoram Forensic Science Laboratory (FSL) chuan kumin 2023 chhungin thubuai 861-ah thil chi hrang hrang 12,796 an endik a, thubuai zingah damdawi ruih theih kaihhnawih a tam ber.
FSL hian Police-ten misual an man tawh kutze thla (fingerprint) chu an khawl-ah an vawng tha thin a, FSL a din tirh atanga tun thlenga kutze thla an neih tawh chu 5,982 a ni. Kutze thla an neihte hi pawikhawihtu convict (thiamloh chantir) tawh mi 3,373 te kutze thla leh pawikhawihtu an man tawh mi 2,609 te kutze thla a ni. FSL-ah hian kumin January - August chhung khan thubuai 861 ah thil chi hrang hrang 12,796 endik a nih tawh laiin, pawikhawihna hmun 69 ah kalin an endik tawh a, Court a thubuai dinpui 196 an nei tawh bawk.Mizoram Forensic Science Laboratory hi July 1, 2000 khan din a ni a. National Human Rights Commission (NHRC) inkaihhruaina dan-in a phal angin March, 2015 khan Directorate puitlingah hlankai a ni. Tunah hian Division 7-ah tihlen tawh niin, Chemistry Division, Question Documents Division, Fingerprint Division, Ballistics and Toolmarks Division, DNA Division, Photography Division leh Toxicology Division-ah then a ni. Mizoram Forensic Science Laboratory (FSL)-a thawktute hi pawikhawihna hmun hrang hrangah kal kualin, finfiahna awm thei angte an lakhawm thin a, pawikhawihtute manchhuahna kawngah Police kutke tangkai ber pakhat an ni.
Comments
Post a Comment