MPF in Vote chhiar ni tur sawn tura ngen an rel

Mizoram People Forum (MPF) chuan Election Commission of India ( ECI) in Mizoram Legislative Assembly inthlan Vote chhiar ni atan a ruat December 3,2023 (Pathianni) chu Kristian te ni serh a nih avangin a hun sawn turin ECI ah ngenna siam nise an ti.

MPF hian nimin khan Mission Veng Presbyterian Kohhran Hall-ah Annual General Meeting vawi 16-na neiin MPF Gen. Hqrs President Rev. Dr. C. Chawnghmingliana kaihhruaina hnuaiah, “Election Commission of India ( ECI) chuan Mizoram State Assembly inthlan hun atan November 7, 2023 a ruat ta a. Vote chhiar hun atan December 3, 2023 a ruat bawk a. Vote chhiar ni atan December 3 (Pathianni) ruat a ni hi Mizoram People Forum chuan tha a ti lova. Christian State tih theih khawpa Mizote za-a za Kristian awmna ah hian Pathianni (Sunday) chu ni serh, Pathian kan biakna ni a nih avangin vote chhiar ni atana hman hi a remchang lo kan ti a. Chuvangin Vote chhiar ni atan hian Inrinni (Saturday) leh Pathianni (Sunday) nilo nidang ruat tha leh turin Election Commission of India (ECI) ah ngen nise kan ti,” tiin Resolution siamin an pass a ni.

Nimin-a MPF Annual General Meeting-ah hian MPF General Secretary Rev. Lalramliana Pachuau chuan Report pein kum 2024-2025 chhunga MPF Budget Rs. 14,03,000/- chu pawm a ni a. Thupui pahnih - ‘MPF kalphung leh hma lak dan tur’ tih Upa Lalramthanga ziak leh ‘Huapzo sawrkar kan mamawh’ tih Rev. K. Lalrinmawia ziak te an zirho a, an sawiho nghal bawk. He hunah hian Local Forum, Constituency Forum, District Forum leh Constituent member te telin MPF Serchhip District hruaitute pawh an tel a ni.