Mizoram Legislative Assembly Inthlanpui 2023 November 7, 2023-ah neih a ni dawn

Election Commission of India chuan kumin a Mizoram Legislative Assembly Inthlanpui neih hun tur nimin khan puangin November ni 7, 2023-ah mipui ten Vote an thlak dawn a, he inthlanna a Vote tla te hi thla thar December 3-ah chhiar tur niin inthlanna hi Assembly bial 40-ah neih a ni dawn a ni.

Mizoram in kumin a Assembly inthlanpui a neih hun tur chungchang hi nimin chhun dar 12:00 khan New Delhi-ah Election Commission of India hotute chuan puangin hemi hnu nimiin chawhnu dar 2:30 khan Mizoram Chief Electoral Officer (CEO) Madhup Vyas, IAS chuan Aizawl-a I&PR Auditorium-ah thuthar thehdarhtute kawmin hemi chungchang hi a sawifiah zui a. Mizoram CEO Madhup Vyas chuan Election Commission of India (ECI) in a puan angin November ni 7, 2023-ah Mizoram MLA Election neih tur a nih thu leh December ni 3, 2023 ah vote chhiar tur a nih thu sawiin, Gazette Notification chhuah hun tur chu October ni 13, 2023 a nih thu leh he inthlan chuh tumte tana hming pek luh hun hnuhnung atan October ni 20, 2023 a nih thu a sawi a. Heng hming pekluh te hi October ni 21, 2023-ah enfiahin Candidate in hnuhdawh theih hun hnuhnung atan October ni 23, 2023 ruat a nih bakah November 7, 2023-ah Vote thlakin heng vote tla te hi December 3-ah chhiar tur a nih thu leh December ni 5, 2023 hmaa inthlanna kaihhnawih zawhfel vek hman tum a nih thu a tarlang a. Media-te chu inthlanna felfai leh dik neih a nih theih nana tih tur leh tih loh turte a tam thei ang ber puangzar tura chahin, MPF leh NGO dangte'n Inthlanna muanawm leh felfai tak neih kawnga theihtawp an chhuah thin chu fakawm a tih thu a sawi a. Mizo mipui vote nei tawh phawt chu vote thlak theuh tur leh vote thlak thatna ber ni tura thawhhopuiah a sawm bawk.

He huna tarlan a nih danin Electoral Roll siamthat hnuhnung ber October ni 4, 2023-a tihchhuah ah Mizoram-ah vote nei 8,56,868 awmin Mipa 4,12,969 leh hmeichhia 4,38,925 bakah Service Voter 4,973 a ni a. Aizawl District chu Vote nei thei tamna ber District niin voter 2,86,807 an awm a, a tlemna ber Hnahthial District-ah voter 16,294 an awm a. Assembly Constituency zinga Vote nei thei tamna ber 36-Tuichawng (Lawngtlai District)-ah voter 36,042 awmin a tlemna ber 34-Thorang (Lunglei District)-ah Voter 14,909 ab awn a. Mipa vote nei tam zawkna District pakhat awmin, Assembly Constituency 10-ah mipa vote nei tam zawkna a awm bawk. Polling Station zingah 13/24-Zemabawk VIII (13-Aizawl East I AC) ah voter tam berin 1,481 an awm a, 34/24-Thehlep (34-Thorang AC) ah tlem berin voter 26 an awm a ni. Mizoram pumah Young voter (18-19 age group) 50611, Senior Citizen voter (kum 80 chunglam) 8490 leh PwD voter 3243 an awm bawk.

Kumin hian Mizoram pumah Polling Station 1276 (Urban 525 leh Rural 751) awmin kum 2018 inthlanpui aiin 112 in a tam zawk a, Assembly Bial tinah Polling Station pakhat tal Hmeichhe hlang leh Vohbikte enkawl din tum niin Model Polling Station pakhat zel siam tum a ni a. Webcasting Polling Station pawh za zela 50-ah leh Critical Polling Station-ah te siam tum a ni.

Kumin hian Vohbik leh kum 80 chunglam voter-te tan In lama vote thlak theihna siam a ni dawn a, hemi tur hian Bial tinah Assistant Returning Officer i/c Home Voting ruat an ni a, Eco-Friendly Election neih tum niin, inthlan venhimna thawk turin State Police bakah CAPF Section 450 chhawr tum a ni a. Election kaihhnawih sum hman viltu tur Team hrang hrang ruat fel tawh a ni bawk a. Ruihhlo leh a kaihhnawihte khauh taka ven tum a ni bawk.

Kumin hian Vote thlakna atan EVM hman leh tur niin EVM leh VVPAT First Level Checking zawhfel a ni tawh a, Ballot Unit 2035, Control Unit 2018 leh VVPAT 2021 te chu inthlanna atana hman turin venhimna khauh tak hnuaiah kawl mek a ni bawk.