Bialtu MLA in Nul neitute hnenah Zikhlum chi pe

Serchhip bialtu MLA Lalduhoma’n Serchhip Mat Phai-a Thlasik thlai chingtute tana Zikhlum chi a lei chu nimin khan Thlasik thlai chingtute hnenah hlan a ni.

Thudawn danin Serchhip Mat Phai-a Thlasik thlai chingtute hian Zikhlum chi hi Horticulture Department atangin kumtin an hmu deuh ber a, amaherawh chu kumin hian an  hmuh mai theih loh avangin Bialtu MLA Lalduhoma hian a mimal sum atangin Zikhlum chi hi a lei sak a, Serchhip-a rawn phurhthlen a nih hnuah nimin zing khan bialtu MLA aiawh hian ZPM Serchhip Block hruaitute chuan Serchhip Agriculture and Horticulture Cooperative Society hruaitute kutah an hlan a, an pawl Vice Chairman F. Zokunga leh a thawhpui ten an dawng a ni.

Serchhip Agriculture and Horticulture Cooperative Society hruaitute chuan Serchhip Bialtu MLA in an harsatna leh mamawh te hriaa Zikhlum chi a ngaihtuah sak chu an lawm hle tih sawiin, nikum hmasa lamah pawh khan harsatna an tawh karah bialtu MLA hian Zikhlum chi hi a lo ngaihtuah sak tawh thu an sawi a. Zikhlum chi an dawn te hi Mat Phai-a Zikhlum chingtute hnenah sem leh a ni dawn tih sawiin, an Society-ah hian Member 250 vel an awm thu leh Zikhlum chingtu hi mi 150-200 vel an nih thu an sawi a ni.

Tun tuma bialtu MLA in Zikhlum chi a pek hi kumdang-a an chin thin nen a inang chiah lo nia thudawn niin kumdang a an chin thin ang hi lei mai tur a awm lo nia thudawn a ni a, tuna an dawn hi  bawm khat Rs. 3250/- man niin bawm khat-ah hian pack 10 zel a awm a, a vaiin cheng nuai 1.3 man vel a ni.