Champhai leh Siaha-ah RTI Week hman a ni

Rampum-a Right to Information (RTI) Week hman mek chu nimin khan Champhai leh Siaha District-ah hman a ni.

Champhai-ah chuan RTI Week hi DC Conference Hall-ah hman niin he hunah hian Champhai District Bawrhsap James Lalrinchhana chuan mipuite rorelna sawrkar (Democracy) leh RTI chu thil kal kawp tlat a ni tih sawiin, Sawrkar hmalakna leh hnathawhte hriat chu khua leh tui te chanvo a nih thu a sawi a. He Dan hi anih tur ang ngeia hman tangkai anih theihnan RTI hnuaia mawhphurna fawng chelhtu SPIO leh SAPIO-te chu he Dan hi lo in zirchianga, a hun bituk chhung ngeia information pechhuak thin turin a chah bawk.

Siaha-ah chuan DRDO Conference Halh-ah RTI Week hi hman niin he hun hi Addl. DC Lalnunmawii chuan a hmanpui a, RTI Act-in mipuite kutah thuneihna sang tak a pe tih sawiin, RTI Act- in a tum ber chu sawrkar rorelna tha leh dik awm tir a, sawrkar hnathawk ten an mawhphurhna an hriat a, mipuiten sawrkar kalphung thuk zawk an hriatna tura thawh a ni, a ti a. Eirukna leh hlemhletna dona atana thil tangkai tak a nih thu pawh sawiin, mipuite chu uar leh tangkai zawka hmang thin turin a chah a. RTI hmansualna kawng tam tak a awm thei tih hriaa, mimal inhuatna avanga RTI hman dik loh a awm fo thin thu a sawi bawk.

RTI Week hi October 5 - 12, 2023 chhung hian India ram pumah hman a ni a. A lawmna pui ber chu Aizawl-ah neih niin District Hqrs. tinah he Hapta chhung hian RTI Act pualin hun an hmang vek dawn a ni.