Mizoram hi leiba ngah ber kan ni - CLP Leader

Congress Legislature Party (CLP) Leader Zodintluanga chuan RBI Data hnuhnung berah Mizoram in GSDP atanga chhutin leiba 56.7% a nei tih sawiin, India rama leiba ngah ber kan nih thu a sawi.

Nimin a Aizawl Press Club-a thuthar thehdarhtute a kawmna ah CLP Leader Zodintluanga chuan khawvel leh India ramin leiba tam zawng tehna a nei tih sawiin, “Chu chu State-in kan thawhchhuah (GSDP) atanga chhuta kan leiba percentage a ni,” a ti a. Reserve Bank of India data-a a chiang tawh (actual) hnuhnung berah chuan Mizoram hian kan GSDP atanga chhutin leiba 56.7% kan nei tih sawiin, Mizoram leiba hi data hnunhnung ber ni mah se, 2023 (budget estimate) ah pawh GSDP atanga kan leiba tura chhut chu 53.1% niin, India rama leiba ngah ber kan ni leh dawn tho niin a sawi a, Chief Minister Zoramthanga chu leibat tam luat avanga tehna dik lo hmanga mipui bum tumah puhin, Mizo mipuite zah lo ah leh tunhma anga bum mai mai theihah mipuite a ngai nia a hriat thu a sawi bawk.

CLP Leader chuan, “CAG report hnuhnung ber kan en chuan Mizoram sawrkar chuan a leibat cheng vbc. 3,797.95 (83.28%) chu a hma-a leiba a lo neih tawh rulhna atan a hmang a, a bak  762.33 (17.72%) chu thil dang atana hman a nih thu chiang taka tarlan a ni. Hei hian kan Finance enkawltu Chief Minister sum enkawl kawngah a hlawhchham tih chiang takin a tilang,” a ti bawk.