BJP in Mizoram inthlanpui lo awm turah Bial 28 vel chuh tura an inbuatsaih thu an sawi

BJP Mizoram Pradesh President Vanlalhmuaka chuan Mizoram Assembly inthlanpui lo awm turah Bial 28 vel chuh turin an inbuatsaih thu a sawi a, bial an chuh zat tur leh Candidate puan hun chu Central lama hotute kutah a awm thu a sawi.

Mizoram BJP President chuan Party dangin BJP beih nana BJP sawrkar chu hnam tlem zawkte leh Sakhaw zalenna duhte tan a himlo niin an sawi thin thu sawiin, Party dang hetiang sawi thin te hian hmasawnna hnathawh sawi tur an neilo niin a sawi a, “An ruihchilh chu Sakhua leh Hnam bil hmanga midang hruaisuala sawrkar tum a ni,” a ti. BJP President chuan kumin inthlanpui ah Congress nilo party dang, ram mipuite rawng an bawl pui theih tur thu leh ram hmasawnna tura thawhpui thei apiang tan an inhawng tih sawiin, Bial 12 velah chak an in beisei tih a sawi a, Central lama an hotute Campaign dan a zirin hei ai hian an lak tam a beisei tih a sawi bawk.

Hetihlai hian, Mizoram-a BJP MLA awmchhun Dr. BD. Chakma chuan kumin a Assembly inthlanpui chuh a tumloh thu a sawi hnuin Central lama an hotuten an ruat anih chuan hnial a tumlo tih a sawi thung a. Dr. BD. Chakma chuan zawhna chhangin inthlan chuh tumna a neilo tih alo sawi tawh thu leh amaherawhchu Central lama hotuten MLA an neihchhun a nih avangin amah chu a din leh ngei a ngai an tih thu leh tun dinhmunah engmah tihchian la awmlo mahse Central lamin Candidate an puan hunah an telh ve anih chuan hnial theih a nih loh thu leh inthlanna a chuh ve mai a ngai dawn niin a sawi a. Inthlanna a chuh anih chuan tun dinhmunah a tlin ngei a beisei thu sawiin, a bial mipuiten an la duh viau thu leh an bial mipuiten Central sawrkara BJP hmalakna chu tha an tih thu a sawi bawk a ni.

Hetihlai hian Vawiin lama BJP-a lawmluh tur nia sawi Lalrinliana Sailo chuan BJP a zawm a nih chuan theihtawpa ram tana tha thawhpui an tiam tih sawiin, Central Sawrkar tel lo chuan Mizoram-ah hmasawnna lian tham a awm theih loh thu leh Mizoram hmasawnna atana BJP kut ke ni turin a zawm dawn tih a sawi a. Meeting hrang hranga a telna atangin Central-ah BJP an sawrkar leh ngei dawn tih a hriat thu sawiin, Mizoram sawrkar chu sum leh pai dinhmun a tha lo a, Central puihna tel lo chuan thil a tih tak tak thei loh tih a sawi. Lalrinliana Sailo chuan BJP-a a luh hian Central chuan thil hrang hrangah puih an inhuam tih sawiin, Assam Chief Minister Himanta Biswas Sarma nen an inbiaknaah Mamit District-a kuhva chingtute'n harsatna nasa tak an tawh chungchangah pawh BJP a zawm anih chuan hma an lak tur thu alo hrilh tih sawiin, BJP ah kuthnathawktute tan hmasawn puina tur a awm thu leh luhna tham a nih thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man