Tui harsat vanga buh chin theihlohna ah Vaimin ching

Kumin hian Champhai District a thingtlang leh Leilet tui hmuh that lohna hmun thenkhatah Agriculture Department hmalaknain Vaimim chin a ni a, tunah hian a thar hma chu seng mek a ni.

Hemi chungchanga Champhai District Agriculture Officer Lalramhluni sawi danin Vaphai khua a Loneituten Tiau lui kamah Vaimim hlawhtling taka an chin bakah Ruantlang leh Tualcheng ramah te Vaimim chin a ni a, Khawbung Block Agriculture Department hnuaiah Vaphai a loneitu chhungkaw 51 te chuan tui harsatna avanga buh chin theih lohna Tiau lui kam, Hmawngpui zau leilet ram hectare 53.7-a zau-ah Vaimim kg.545 an ching a, quintal 1350 vel thar theih an inbeisei a. Ruantlang khuaa chhungkaw 40 leh Tualcheng khuaa chhungkaw 30 ten thingtlang-ah Vaimim hi an ching bawk a, tunah hian a thar hma ho chu an sengkhawm tan a ni.

Kum kalta khan Vaphai khuaa Vaimim chingtute chuan Serchhip DAO hnenah Vaimim an tharchhuah hi kg khat Rs. 20 hisapin quintal 500 an hralh a, kuminah chuan Champhai District a Vaimim tharte chu Agriculture Department leh Champhai Large Agriculture Multipurpose Society (Ltd) ten inremna thuthlung an ziak dung zuiin man man zawkin ranchaw atan Loneituten an hralh thei tawh dawn a ni.