Mizoram-ah ke chauh-a tlawhpawh theih Polling Station 22 a awm mek

Thla thar November ni 7-a Mizoram State Assembly inthlanpui neih tura vote thlak turin inbuatsaihna ngawrh taka kalpui mek a ni a, Mizoram pumah Polling Station 1276 awmin heng zinga 22 te chu ke hmang chauha tlawhpawh theih an ni a, Polling Station 19 te chu Lawng-a kal ngai an ni.

Mizoram Election Department tarlan danin, Polling Station hrang hrang zinga ke chauha tlawhpawh theih hi Lunglei District-ah tam berin 11 lai a awm a, Mamit District-ah Polling Station 6 awm bawkin Lawngtlai District-a Polling Station 5 chu lirthei-a tlawhpawh theih loh leh ke-a kal ngai a ni bawk. Mizoram-a Polling Station 19 te chu Lawng hmang chauha tlawhpawh theih ni bawkin Lawng chauha tlawh pawh theih Polling Station hi Lunglei, Lawngtlai leh Mamit District-ah te an awm a. Lunglei District-ah hian Thorang bial-ah khaw 4 te chu Lawng hmanga tlawhpawh ngai niin West Tuipui bial-ah khaw 10 chu Lawng hmang chauha pawh theih an ni a, Lawngtlai District-ah khaw 4 chu Lawng hmanga kal ngai niin Mamit District-ah hetiang hi khaw pakhat a awm bawk a ni.

Heng bakah hian khaw 6 chu Thal lai pawha Lawng-a tlawh ngai a ni a, heng te hi Lunglei District Thorang bial-a Polling Station 2 leh West Tuipui bial-ah khaw 3 bakah Mamit District-a khaw pakhat te an ni.

Mizoram Chief Electoral Officer (CEO) MadhupVyas chuan niminpiah-a thuthar thehdarhtute a kawmna ah zawhna chhangin Mizoram chhunga Polling Station ke chauha tlawhpawh theih chu siamthat tumin PWD hotute leh kawng siam mektu Company te nen an inbia tih a sawi a, inthlan hma ngeia Motor tlawhpawha siam theih turin hmalakna a kal mek a, a tam thei ang ber siamthat hman tum a nih thu a sawi bawk.

Mizorama Polling Station awm zawng zawng 1276 zinga 39 chu venhim ngai zual, Critical Polling Station a ni a, heng te hi Mizoram District hrang hrang 6-ah awmin Mamit District-ah Critical Polling Station hi tam berin 13 lai a awm a, Kolasib District-ah 7 awmin Champhai District-ah 4 a awm a, Aizawl District, Lawngtlai District leh Saitual District-ah te Critical Polling Station 3 theuh awmin District dangah chuan hetiang venhim ngai zual hi a awm lo a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar