Midang hming-a Bank loan lak thu ah mi pakhat man

Tunhnai khan Lunglei Police te chuan sum hmanga inbumna lian tak kaihhnawih ah thubuai ziaklutin hemi kaihhnawih ah hian Michael Chhakchhuak tia hriat lar chu manin Jail-ah dahluh a ni tawh.

Thulakna in a tarlan danin thla kalta September 2023 khan Lallawmzuali chuan Loan lak tumin Bank dangah a kal a, hetah hian a CIBIL score hniam avangin a loan dilna chu hnawl sak a nih thu leh a hminga loan tam tham tak a awm thu an lo hrilh a. Loan chu a hming hian Michael Chhakchhuak in a lak thu leh vawi khat mah a la rul lo tih hriatchhuah a ni zui ta bawk a. Michael Chhakchhuak hian Aizawl-a Bank lian tak pakhat atangin Lallawmzuali hming leh document hmangin a phalna la lovin cheng nuai 10 a la nia sawi a ni. Hemi chhuina kal zelah hian V. Laldinpuii (Lunglei), tuna Bihar-a cheng mek hming pawhin hetiang zat bawk hi Michael Chhakchhuak hian a lo la tih hriatchhuah a ni bawk a ni.

He thil thleng chungchangah hian Lunglei Police te chuan theihtawp chhuaha hma la nghalin 420 IPC hnuaiah thubuai ziahluh a ni a. Lunglei SP Rahul Alwal chuan L:unglei Police te chuan sum hmanga inbumna thil chu an ngai pawimawhin hetiang kawnga inhnamhnawih thin te chu chhuichhuaha hrem zel an tum thu a sawi a. Mipuite pawh hetianga mi bum ching te lakah hian fimkhur tur leh an Bank Account details te midang hnena pe lo turin a chah a. An hmingin midang in loan an la em tih CIBIL score hriat tum thin turin a chah bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar