House to house campaign a remchang tawh lo - MPF

Mizoram People Forum (MPF) chuan Political Party-te nen thawhhona thuthlung an lo siam tawh angin State Assembly inthlan puan a nih tawh avangin In tin luhchhuaha Campaign a remchang tawh lo, an ti.

Hemi chungchangah hian Inrinni khan thuchhuah siamin MPF chuan, Election Commission of India (ECI)-in State Assembly inthlan a puan tak avangin MPF leh Political party ten inthlan chungchanga thawhona thuthlung an lo siam tawhah, ‘House to house Campaign phal loh tur chu inthlan puan hun atanga hman tan a ni ang’ tih a nih thu tarlangin, thawhhona thuthlung angin House to house Campaign a remchang tawh lo, an ti a. Hei hi inthlanna thianghlim leh zalen a awm theihna tura tih anih vangin Political party tin ten thuthlung a nih ang ngeia zawm hram hram ni se, an ti bawk.

MPF chuan District Forum, Constituency Forum leh Local Forum te chu an huamchhung theuhah theihtawpa tan lo la tur leh thawhhona thuthlung tha taka zawm a nih theihna tura tan la turin an ngen a ni.