Mahatma Gandhi piancham lawmna pualin The Grand Gandhi Jayanti Exhibition neih a ni

Raj Bhavan Secretariat leh Department of Commerce & Industries Department te tangkawp buatsaihin nimin atang ni thum chhung awh tur ‘The Grand Gandhi Jayanti Exhibition’ chu nimin khan Raj Bhavan Circular Lawn-ah neih tan a ni a, Governor Dr. Hari Babu Kambhampati chuan a hawng a ni.

Mahatma Gandhi piancham lawmna denchhena buatsaih ‘The Grand Gandhi Jayanti Exhibition’ hi Governor Dr. Hari Babu Kambhampati chuan hawngin India Hnam Pa, Mahatma Gandhi zahna chibai a buk hmasa a. He Exhibition hi Mahatma Gandhi zirtirna zulin khawtual-a kan thil siam leh dehchhuah te ngaihhlut inzirtirna bakah kan khawtuala sumdawng leh kuthnathawktute chawikanna atana buatsaih a nih thu a sawi a. Mizoram ang State tenau zawkah hian Handloom Industry, Micro, Mini leh Medium Business Unit lam hawia kan Entrepreneur ten hma an lak a fuh ber tih sawiin, “Kan State a lian lova, mihring kan tlem bawk si avangin Industry lian pui pui din a remchang lo mai thei e. Mahse, kan tualchhunga tharchhuah leh In lamah kan lo siamchhuah theih apiang te hi hlawk takin sum-ah kan chantir thei a. Hemi huanga eizawng te hi kan duhsak a, an thil siam te kan hlutsak a ngai a ni,” a ti. Tun tuma Raj Bhavan tual zawla Exhibition buatsaihah hian mi zawng zawng te kal tura sawmin, heng dawrte a thil zawrh te hi leisak theuh turin sawmna a siam bawk a ni.

Nimin-a Exhibition hawnna hun hi Commerce & Industries Department changtu Minister Dr. R. Lalthangliana pawhin hmanpuiin State chhunga Entrepreneur te tana hun pawimawh tak Raj Bhavan-ah a lo thlen sak avangin Governor hnenah hian lawmthu a sawi bakah he Exhibition buatsaihna atan senso engmaw zat a rawn tum sak avangin Ministry of Textile chungah lawmthu a sawi bawk a. Kan sumdawng te, a bikin Handloom leh Handicraft huanga hmalatute chu an thilsiam te a rawn mawimam chho zel a, belhchian a dawl chho telh telh nia a hriat thu sawiin, tanla zual sauh sauh turin a fuih a. Mizo puan, kawr leh thawmhnaw te bakah Handicraft huang kutthemthiamte thilsiam te chu a mawimam a, belhchian a dawl a nih phawt chuan a leitu ten sum tam zawk sengin an lei ngam reng tih a sawi bawk.

Governor in a hawn tak Exhibition ang hi Raj Bhavan in a buatsaih vawikhatna a ni a. He hunah hian a duh apiang ten Raj Bhavan tlawh in Exhibition hi a chhim theih a, Dawr 62 a awm a, heng ah te hian Handloom lam thil bakah kut themthiamna atanga siamchhuah thil tha tak tak te, Food Processing Unit atanga siam eitur chi hrang hrang te, Food Court te bakah PM Viswakarma Yojana ngaihven duhte tana Help Desk te leh Loan la duh te tana pan tur Help Desk te pawh chhawpchhuah a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man