Serchhip-ah Village Level Task Force on Ruihhlo Do kalpui dan tur leh an hmalak dan tur sawiho a ni

Nimin khan Serchhip-ah District Level Task Force on Ruihhlo Do chu an Chairman leh District Bawrhsap David Lalthantluanga hova thukhawmin Village Level Task Force on Ruihhlo Do kalpui dan tur leh an hmalak dan tur hrang hrang te sawiho a ni.

He thutkhawm Serchhip DC Conference Hall-a neih ah hian thutkhawm kaihruaitu Serchhip District Bawrhsap David Lalthantluanga chuan ruihhlo in nasa taka min luhchilh thute, Damdawi hmansual in a kentel HIV/AIDS natna pawh a hluar nia hriat a nih thu te sawiin, ruihhlo dona kawngah mipui, Khawtlang leh Department hrang hrangte tanrual a pawimawh thu leh Village Level Task Force te chu sawrkar kut leh ke pawimawh tak a nih thu a sawi a, thahnem ngai taka Ruihhlo do kawngah hma la a, thawhhona tha tak nena thawh a pawimawh thu a sawi bawk.

He thutkhawm ah hian Serchhip SP MS. Dawngkima chuan Ruihhlo Do chu an ni tin hnathawh in a ken tel a nih thu leh mal tan mai lova tanrual ngai thil a nih thu a sawi a, VLTF te leh Sawrkar Department ten thawhona tha tak neih a pawimawh thu sawiin, September thla chhung khan Serchhip District Executive Force ten zirna In pasarih bakah Kohhran pakhat ah Ruihhlo thatloh zia inzirtirna an kalpui tawh thu a sawi bawk. Excise & Narcotics Department Serchhip-a Asst. Commissioner Malsawmkima pawhin VLTF ten thahnem ngai taka Ruihhlo Dona kawnga hma an lakna kawngah thamna laka fihlim tlat turin a fuih a, an hmalakna a chak zawk theihna turin Mizoram-a ruihhlo tawlhluh hrang hrangte chu an lan dan a taka in entirna hun buatsaih dan kawng zawn nise a ti a. District Level Task Force on Ruihhlo Do-a Member Secretary leh Serchhip Sub-Hqrs. YMA President Kawlthuama pawhin District Level Task Force on Ruihhlo Do ten hma an lak tawhna te he hunah hian a tarlang bawk.

He thutkhawm ah hian State Level Working Committee in Ruihhlo Do chungchang inzirtirna atana District tin aiawh Master Trainer Training a buatsaiha Serchhip District atanga thlanchhuah te hnen atangin thusawi ngaihthlak a ni bawk a, Serchhip District-ah hian Master Trainer pali (4) thlanchhuah niin, August ni 20, 2023 khan Aizawl-ah training an lo nei tawh a, State Level Working Committee chuan Ruihhlo Dona kawngah kum lama naupang zawk, la ti ve lo te venhim chu a ngaih pawimawh thu leh uar taka zirtirna pek chu an ngaih pawimawh thu te an sawi bawk.

District Level Task Force on Ruihhlo Do thukhawm hian State Level Working Committee in ti tura a tih angin, Village Level Task Force on Ruihhlo Do la in dinlohna ah te din thuai nise an ti a, hmalakna a chak zawk theih nan District Level Task Force on Ruihhlo Do bakah Village Level Chairman te telna Whatsapp Group siam bakah, Village Level tinah Whatsapp Group siam te, Master Trainer te nen a tam thei ang ber Awareness neih thin nise tihte, Village Level-ah Training buatsaih thin nise tihte, VLTF ten Supply Reduction, Demand Reduction leh Harm Reduction-a an hmalak dan tur chungchang ah te ruahmanna siam a ni bawk.

Comments

Popular News (Last 30 Days)

Vawiin-ah HSSLC Exam result