Khawzawl DC Office building thar leh District Hriatrengna Lungphun te hawn a ni

Khawzawl Deputy Commissioner Office Buiding thar leh District Hriatrengna Lungphun chu nimin khan Deputy Chief Minister Tawnluia chuan a hawng.

Nimin a heng thil pahnih hawnna hunah hian bialtu MLA ni bawk Tawnluia chuan hripui lengin kum hnih zet sawrkar thutchilh mah se, sawrkarin theihtawpin hmasawnna hna a thawk mek zel tih sawiin, Khawzawl District chhungah ngei pawh sawrkar Office 24 dah a ni tawh tih a sawi a. Revenue Office tihchangtlun te, District Local Administration Office leh District Transport Office bun te pawh hmachhawpah a tel thu a sawi. Deputy CM chuan Khawzawl District Hospital chungchang pawh sawiin, DoNER Ministry chuan khum 50 awmna tur Khawzawl District Hospital sakna tur a pawm (approve) tawh tih a sawi a, Specialist Doctor in damdawi In an thutchilh theih nan post siam (create) a nih tawh thu a sawi bawk.

Khawzawl DC Office Building thar hi Special Assistance to State for Capital Expenditure (SASCE) 2020-21 hnuaia sum hmuh cheng nuai 1,000 hmanga sak a ni a. Mizopa chhiara chhawng li (4) a sang niin Chhawng hnuai ber (Basement-II)-ah Canteen, Garage leh Driver Room te a awm a, a chung chiahah (Basement-I)-ah Room 11 awmin Election Branch, Revenue Branch, Record Room leh a dangte a awm a. A chhawng thumnaah (Ground Floor)-ah Additional DC, Sub-Deputy Commissioner Room, Superintendent leh General Branch tiamin Room 14 a awm a, chhawng lina (First Floor)-ah Room 9 - Deputy Commissioner Room, SDO (Sadar) Room, Meeting Room leh a dangte a awm a; chhawng tinah hian inthiarna (toilet) dah vek a ni bawk.

Khawzawl District Hriatrengna Lungphun hawn tak hi Khawzawl DC Office Building thar kawtah phun a ni a. Lungphun hi feet 12 a sei, feet 15 a sang a ni a. A chhipah hian zana eng thei turin ‘Lamp’ dah a ni. Lungphun hi chhawng hnih-a siam niin a hnuai hmai li leh a chung kil thum nei a siam a ni a; a hnuaiah hian Mizo leh English-in Khawzawl khaw pianchhuah dan, rambuai lai chanchin leh District a nih chhoh dan te ziah a ni a; Khawzawl District chhunga Kumpinu sawrkar laka zalenna sualtute - Laburha Sailo, Nikuala Zahau, Kairuma Sailo, Sangtonga, Pakulha, Taibeha, Sama Mawnga te chanchin pawh ziah a ni.

A chung kil thumah hian - Mizo, English leh Hindi-in ‘Khawzawl District Hriatrengna Lungphun’ tih leh District Function tan ni - 12.08.2019 te ziah a ni. Lungphun hi Rs. 455,000 senga siam niin, Granite phek 14-ah thumal 4,000 chuang ziah a ni a. Nimin-a hemi puala inkhawm neih hi Khawzawl DC Lalrohlua chuan a kaihruai a ni.

Comments

Popular News (Last 30 Days)

LPG man bithliah thar